طویل ویک اینڈ کےباعث مری میں سیاحوں کا ایک بار پھر رش لگ گیاہے جس سے ٹریفک جام شروع ہوگیا ہے، تاہم ٹریفک کی روانی کو برقرار رکھنے کیلئے انتظامیہ نے اقدامات شروع کردیئے ہیں۔
تفصیلات کے مطابق ہفتے سے منگل کےروز تک تعطیلات کی وجہ سے شہریوں کی ایک بڑی تعداد نے مری کا رخ کرلیا جس کی وجہ سے مری میں ایک بار پھر سڑکوں اور ہوٹلوں پر شدید دباؤ نظرآنا شروع ہوگیا ہے،مال روڈ، نتھیا گلی سمیت مشہور سیاحتی مقامات پر عوام کا شدید رش ہے جس کی وجہ سے سیاحوں کو مشکلات کا سامنا بھی کرنا پڑرہا ہے۔
بڑی تعداد میں گاڑیوں کے مری داخل ہونے کی وجہ سے متعددمقامات پر ٹریفک جام ہونا شروع ہوگیا ہے، چند منٹوں کا فیصلہ گھنٹوں میں ہورہا ہے، گھنٹوں تک ٹریفک جام میں پھنسے رہنے کی وجہ سے گاڑیوں میں پیٹرول ختم ہونے کا خدشہ بھی پیدا ہوگیا ہے جس کی وجہ سے مزید مسائل بڑھ سکتے ہیں۔
ٹریفک کی روانی کو بحال رکھنے اور کسی بھی ناخوشگوار واقعہ سے نمٹنے کیلئے راولپنڈی ریجن پولیس نے ہنگامی بنیادوں پر اقدامات کرنا شروع کردیئےہیں۔
ریجنل پولیس آفیسر راولپنڈی ریجن عمران احمرکےاحکامات کےمطابق ملکہ کوہسارمری میں ٹریفک وضلعی پولیس، سی ٹی او اور ایس پی کوہسار کی براہ راست نگرانی میں ٹریفک کورواں دواں رکھنے میں مصروف عمل ہیں۔
آر پی او راولپنڈی آفس کی جانب سے ٹویٹر پرجاری کردہ بیان میں کہا گیا ہے کہ فیلڈافسران ٹریفک کی روانی اورسیاحوں کے باسہولت سفر کو یقینی بنارہے ہیں۔
دوسری جانب ٹریفک پولیس راولپنڈی کی جانب سے جاری کردہ بیان میں کہا گیا ہے کہ مری میں سیاحوں کے رش کی وجہ سے ٹریفک جام کو دیکھتے ہوئے آئی جی پنجاب فیصل شاہکار نے مری میں اضافی نفری تعینات کرنے کے احکامات دے دیئےہیں۔