خیبرپختونخواہ میں آزاد حیثیت سے منتخب ہونے والے بلدیاتی نمائندوں کی بڑی تعداد نے پاکستان تحریک انصاف میں شمولیت اختیار لی ہے۔
تفصیلات کے مطابق وزیراعلیٰ ہائوس خیبرپختونخوا میں ایک تقریب ہوئی جس میں شانگلہ، کوہاٹ، پشاور، سوات، دیر، باجوڑ، چترال، مردان اور چارسدہ ودیگر علاقوں سے آزاد حیثیت میں منتخب ہونے والے بلدیاتی نمائندوں کی بڑی تعداد نے پاکستان تحریک انصاف میں شمولیت اختیار لی ہے۔وزیراعلیٰ خیبرپختونخوا محمود خان نے بلدیاتی نمائندوں کو تحریک انصاف میں خوش آمدید کہا اور مبارکباد دیتے ہوئے انہیں پارٹی کی ٹوپیاں بھی پہنائیں۔
وزیراعلیٰ خیبرپختونخوا محمود خان نے پشاور میں پشاور اور ملاکنڈ ریجنز کے ولیج اور نیبر ہڈ کونسلز کے چیئرمینز سے خطاب کرتے ہوئے کہ کہ پاکستان ڈیموکریٹک موومنٹ (پی ڈی ایم) کا ڈرامہ جلد ختم ہونے والا ہے، نچلی سطح پر عوام نے پی ڈی ایم میں شامل ہونے والی تمام جماعتوں کو صفایا کر کے رکھ دیا ہے۔ وزیراعلیٰ نے کہا کہ پاکستان تحریک انصاف ملک بھر کی مقبول ترین جماعت بن کر ابھری ہے، عوام نے بھی اپنا فیصلہ سنا دیا ہے، جلد ہی چوروں اور ڈاکوئوں کے ٹولے سے نجات حاصل ہوگی۔ پاکستان کی باشعور عوام کے تعاون سے حقیقی آزادی مارچ کو ہر صورت کامیاب کیا جائے گا۔
انہوں نے کہا کہ چیئرمین تحریک انصاف عمران خان کی قیادت میں عوام کیلئے حقیقی آزادی کے حصول تک پیچھے ہٹنے والے نہیں ہیں، عمران خان پاکستان کی آواز اور ملک کی ضرورت ہے، ان کی مقبولیت میں ہر آنے والے دن کے ساتھ اضافہ ہو رہا ہے، وہ آنے والی نسلوں اور پاکستان عوام کی آزادی کیلئے جنگ لڑ رہا ہے۔
بلدیاتی نمائندوں کی پاکستان تحریک انصاف میں شمولیت ہماری قیادت پر عوام کے بھرپور اعتماد کا کی عکاس ہے۔انہوں نے اس موقع پر وفاقی حکومت پر تنقید کرتے ہوئے کہا کہ موجودہ امپورٹڈ حکومت کے پاس عوام کی فلاح وبہبود کیلئے منشور نہیں، ان کا ایک ہی مقصد ہے وہ قومی وسائل کی لوٹ مار ہے جو یہ لوگ گزشتہ تین دہائیوں سے کر رہے ہیں۔
یاد رہے کہ تقریب میں مختلف علاقوں کے 100 سے زائد ولیج ونیبر ہڈ کونسلز کے چیئرمین نے پاکستان تحریک انصاف میں شمولیت کا اعلان کیا ہے جبکہ گزشتہ روز بھی ہری پور اور سائوتھ ریجنز کے 200 سے زائد بلدیاتی نمائندوں نے پی ٹی آئی میں شمولیت اختیار کرنے کا اعلان کیا تھا، وزیراعلیٰ محمود خان نے بلدیاتی نمائندوں کو پارٹی کی ٹوپیاں بھی پہنائیں تھیں۔
