عالمی وبا کورونا کیخلاف مؤثر اقدامات، پاکستان عالمی رینکنگ میں دوسرے نمبر پر
کورونا کی وبا میں مؤثر اقدامات کرنے پر پاکستان نے اکانومسٹ نارملسی انڈیکس میں دوسری پوزیشن حاصل کرلی۔ دی اکانومسٹ نارملسی انڈیکس کے مطابق پاکستان نے کورونا کی وبا کے باعث نافذ لاک ڈاؤن کے خاتمے پر اقتصادی اور معاشرتی سرگرمیوں کی بحالی کے لئے موثر اقدامات کئے۔
اکانومسٹ کے مطابق پاکستان دنیا کا واحد ملک ہے جو تینوں رینکنگز میں شروع کی 3 پوزیشنز پر ہی براجمان رہا ہے۔ نارملسی انڈیکس کے پہلے جائزے میں پاکستان تیسرے جبکہ دوسرے جائزے میں پہلے نمبر تھا۔
نئی درجہ بندی میں مصر پہلے نمبر پر ہے جبکہ انڈیکس میں مختلف ممالک میں کووڈ 19 کے خلاف اقدامات ، کووڈ میں کمی یا اضافے کی بنیاد پر درجہ بندی کی گئی ہے۔
اس حوالے سے سربراہ این سی او سی اور وفاقی وزیر اسد عمر کا کہنا ہے کہ اکانومسٹ گلوبل نارملسی انڈیکس میں پاکستان دنیا بھر میں دوسرے نمبر پر ہے جس میں معاشرے اور معیشت کی کوویڈ کے بعد بحالی کی جانچ کی گئی ہے، ان کا کہنا تھا کہ یہ درجہ بندی 3 بار کی جا چکی ہے اور تینوں بار پاکستان دنیا کے ٹاب 3ممالک میں ہی رہا ہے۔
