معروف پاکستانی گلوکار علی ظفر کی آواز میں پاکستان میں منعقد ہونے والی اسلامی تعاون تنظیم (او آئی سی ) کی 48 ویں وزرائے خارجہ کی کانفرنس کا آفیشل ٹریک جاری کر دیا گیا ہے۔ جو کہ ریلیز ہوتے ہی مقبول ہو گیا ہے۔
پاکستانی دفترِ خارجہ کے آفیشل ٹوئٹر ہینڈل پر بھی اس آفیشل ٹریک کی ویڈیو شیئر کی گئی ہے۔ دفترِ خارجہ کی جانب سے یہ ویڈیو شیئر کرتے ہوئے کہا گیا ہے کہ اس آفیشل ٹریک کے ذریعے پاکستان کی او آئی سی اور امتِ مسلمہ کے ساتھ مضبوط وابستگی کو خراجِ تحسین پیش کیا گیا ہے۔
اس آفیشل ٹریک کی ویڈیو میں پاک فوج کی عالم اسلام اور وطن عزیز کیلئے دی جانے والی قربانیوں اور قابل قدر خدمات پر بھی روشنی ڈالی گئی ہے اور ساتھ ہی باور کرایا گیا ہے کہ پاکستان ہی واحد مسلم ملک ہے جو کہ ایٹمی قوت کا حامل ہے۔
اس آفیشل ٹریک کا تھیم "اللہ کی رسی کو مضبوطی سے تھامے رکھو اور تفرقے میں مت پڑو" ہے جب کہ اسے نغمہ نگار جمیل الدین عالی نے لکھا ہے۔
یاد رہے کہ معروف شاعر اور نغمہ نگار جمیل الدین عالی نے 1974 میں پاکستان میں منعقد ہونے والی اسلامی سربراہی کانفرنس کے موقع پر یہ ترانہ تخلیق کیا تھا اور اسے بے پناہ مقبولیت ملی تھی۔