سابق صدر مملکت آصف علی زرداری کے اسکول کے زمانے کے دوست نے ان پر پراپرٹی پر قبضے کا الزام عائد کردیاہے۔
تفصیلات کے مطابق پیپلزپارٹی کےشریک چیئرمین آصف علی زرداری کے زمانہ طالب علمی کے دوست اور ان کےکاروباری شراکت دارمصطفیٰ میمن نے زرداری پرالزام عائد کیا ہے کہ ان کی تمام پراپرٹی بشمول پیٹرول پمپس کو آصف زرداری کے حکم پر مسمار کیا جا رہا ہے۔ کراچی پولیس کوئی مدد نہیں کر رہی۔
اپنے ایک ویڈیو بیان میں مصطفیٰ میمن کا کہنا تھا کہ یہ 9 دسمبر کا واقعہ ہے جب میرے دو پیٹرول پمپس اور 2 سی این جی اسٹیشنز، ہوٹل اور دوکانوں پر سابق صدر آصف علی زرداری کے احکامات پر قبضہ کرلیا گیا۔
انہوں نے کہا کہ اس سے قبل میرے بیٹے کو اپنے گھر بلا کر اس سے جبری طور پر پراپرٹی ٹرانسفر کرنے کا کہاگیا، پھر مجھ پر دباؤ ڈالا گیا۔
مصطفیٰ میمن نے کہا مجھ سے شناختی کارڈز اور گھر کی خواتین کی تصاویر دینے کا مطالبہ کیا گیا،انکار پر میری پراپرٹی پر قبضہ کروایا گیا۔
انہوں نے کہا کہ عدالتی حکم کے باوجود آصف علی زرداری نے بلڈوزر سے میری جائیدادوں کو مسمار کرانا شروع کردیا ہے۔