وزیراعظم عمران خان کے معاون خصوصی ڈاکٹر شہباز گل نے کہا ہے کہ اپوزیشن کے مختلف نظریات کی جماعتوں کو اگر کسی سے خطرہ ہے تووہ صرف عمران خان ہے۔
مائیکروبلاگنگ ویب سائٹ ٹویٹر پر ڈاکٹر شہباز گل نے پیپلزپارٹی کے شریک چیئرمین آصف علی زرداری اور مسلم لیگ ن کے صدر میاں شہباز شریف کی ملاقات پر ردعمل دیتے ہوئے اپنے ماضی کے بیانات کو شیئر کیا جس میں انہوں نے دونوں جماعتوں کی ملاقات پر اپنا ردعمل دیا تھا۔
ایک ویڈیو مئی 2019 کی تھی جس میں ڈاکٹر شہباز گل نے اس وقت مریم نواز اور بلاول کی ملاقات پر ردعمل دیتے ہوئے کہا تھا کہ ہم 23 سال سے کہہ رہے ہیں کہ یہ دونوں جماعتیں ایک ہی سکے کے دو رخ ہیں۔
ڈاکٹر شہباز گل نے یہ ویڈیو شیئر کرتےہوئے کہا کہ آپ کو پہلے بھی بتایا تھا آج دوبارہ بتا رہے ہیں آئندہ بھی بتاتے رہیں گے کرپٹ لوگوں کو اگر کوئی خطرہ ہے تو وہ صرف عمران خان سے ہے۔
انہوں نے مزید کہا کہ لیکن انشاء اللہ جیت پاکستان کی ہو گی. جیت عمران خان کی ہوگی۔ ہار کرپٹ ٹولے کی ہو گی۔
دوسری ویڈیو سماء نیوز کی ایک رپورٹ تھی جس میں موجودہ اپوزیشن جماعتوں کے رہنماؤں کے ماضی کے بیانات شامل تھے جس میں وہ ایک دوسرے کو چور لٹیرے کہتے اور تنقید کرتے سنائی دے رہے ہیں۔
ڈاکٹر شہباز گل نے یہ ویڈیو شیئر کرتے ہوئے کہا کہ عوام کو ان کی اصلیت معلوم ہے جنہیں ابہام ہے وہ بھی دور ہو جائے گا آخر ایک دوسرے کے ازلی حریف بالکل مخالف نظریات رکھنے والی جماعتیں اور شخصیات عمران خان سے اتنی خوفزدہ کیوں ہیں؟
انہوں نے مزید لکھا کہ انکی لوٹی دولت کو اگر کوئی خطرہ ہے تو اسکا نام عمران خان ہے۔
شہباز گل نے مزید کہا کہ زرداری نے کہا حکومت کے بہت سے لوگ ان کے ساتھ رابطے ہیں۔ کمال ہے آپ کے تو رابطے ہیں۔ ہمارے تو زیراثر ہیں یوسف رضا گیلانی اور اپوزیشن کے بہت سے ارکان اور ہماری خواہش پر ووٹ ڈالتے ہیں یا سینیٹ سے باہر رہ کر اپوزیشن کو اکثریت ہونے کے باوجود شکست دیتے ہیں۔
