خیبرپختونخوا کے ضلع مانسہرہ کی خاتون اسسٹنٹ کمشنر ماروی ملک نے حملے کے بعد پھر سے کام شروع کر دیا ہے اور سوشل میڈیا پر پہلا بیان جاری کیا ہے۔
ماروی ملک شیر نے سماجی رابطے کی ویب سائٹ ٹوئٹر پر جاری کردہ پیغام میں ڈیوٹی کے دوران لی گئی ایک تصویر شیئر کی جس میں وہ دیگر افسران کے ہمراہ فیلڈ ڈیوٹی پر نظر آ رہی ہیں۔
ماروی ملک نے اپنی ٹوئٹ میں لکھا کہ "جن کے دل میں خدا ہو وہ کبھی نہیں گرتے "، لیڈی اسسٹنٹ کمشنر نے اپنی ٹوئٹ میں پاکستان زندہ باد اور مانسہرہ کا ہیش ٹیگ بھی استعمال کیا۔
یاد رہے کہ کچھ روز قبل اسسٹنٹ کمشنر مانسہرہ ماروی شیر ملک کی گاڑی کو 3 ملزمان کئی بار اوور ٹیک کیا اس دوران ملزمان اسسٹنٹ کمشنر ماروی ملک کی تصاویر اور ویڈیوز بناتے رہے بعد ازاں غازی کوٹ میں 3 افراد نے ان پر حملہ کر دیا تھا۔
ملزمان نے اے سی ماروی ملک شیر کی گاڑی کے سامنے اپنی گاڑی روک کر دھمکی دیتے ہوئے کہا کہ یہ خاتون ہوکر ہم پر اے سی تعینات ہوئی، ہم کسی خاتون کو اسسٹنٹ یا ڈپٹی کمشنر نہیں مانتے۔
تلخ کلامی کے دوران ایک ملزم نے اے سی کو گولی مارنے کی دھمکی بھی دی اور کھینچا تانی کے دوران لیڈی اسسٹنٹ کمشنر ماروی شیر ملک کا ہاتھ زخمی ہو گیا تھا۔ ملزمان نے اسسٹنٹ کمشنر کے گارڈ پر تشدد کرکے اس کا بازو توڑ دیا تھا جبکہ موقع پر موجود افراد نے تینوں ملزمان کو پکڑ کر پولیس کے حوالے کر دیا تھا۔