الیکشن کمیشن آف پاکستان نے کہا ہے کہ تحریک انصاف کے اراکین کے اسمبلی سے استعفوں کا معاملہ جیسے ہی الیکشن کمیشن کو موصول ہوگا اس پر قانون کے مطابق کارروائی کی جائے گی۔
الیکشن کمیشن کی جانب سے جاری کردہ اعلامیہ کے مطابق چیف الیکشن کمشنر سکندر سلطان راجہ کی سربراہی میں الیکشن کمیشن کا اجلاس ہوا جس میں تحریک انصاف کی جانب سے لکھے گئے خط پر غور کیا گیا، اس خط میں تحریک انصاف نے موقف اپنایا ہے کہ ان کے تمام اراکین نے قومی اسمبلی کی نشستوں سے استعفے دیدیئے ہیں جبکہ منحرف اراکین کے حوالے سے ریفرنس بھی الیکشن کمیشن کو بھیجا جاچکا ہے۔
الیکشن کمیشن کے مطابق قومی اسمبلی کے اسپیکر کی جانب سے تاحال کسی رکن کا استعفیٰ الیکشن کمیشن کو موصول نہیں ہوا،جیسے ہی استعفے موصول ہوں گے ان پر قانون کے مطابق کارروائی کی جائے گی جبکہ منحرف اراکین کے حوالے سے ریفرنس پر کارروائی کیلئے قومی اسمبلی کے تمام اراکین کو 28 اپریل کیلئے نوٹسز جاری کردیئے گئے ہیں۔
الیکشن کمیشن کے مطابق صوبائی اسمبلی میں تحریک انصاف کے منحرف اراکین کو 6 مئی کیلئے نوٹسز جاری کردیئے گئے ہیں تاکہ ان کیسزپر سماعت کی جاسکے، اس معاملے میں تحریک انصاف کو بطور فریق نوٹس جاری کیا جاچکا ہے۔
