وفاقی وزیرداخلہ راناثنااللہ نے پی ٹی آئی کے رکن قومی اسمبلی عطااللہ ایڈووکیٹ کی جانب سے خودکش حملے کی دھمکی پر جواب دے دیا اور کہا کہ اگر ان میں سے کوئی ایسا کر گیا تو میں اس کا ذمے دار ہوں۔
نجی چینل جیو نیوز کے پروگرام آج شاہ زیب خانزادہ کے ساتھ میں رانا ثنااللہ نے کہا کہ جو دھمکیاں دے رہے ہیں، اگران میں سے کوئی خودکش حملہ کرے گا تو میں ذمے دار ہوں۔ اگر ہم چاہیں تو پی ٹی آئی کے پندرہ بندوں پر پانچ پانچ کلوہیروئن کا کیس ڈال کر انہیں گرفتار کرا دیں مگر ہم کوئی ایسا گھٹیا کام نہیں کریں گے۔
یاد رہے کہ پی ٹی آئی کے رکن قومی اسمبلی عطا اللہ ایڈووکیٹ کی جانب سے ایک ویڈیو بیان جاری کیا گیا تھا جس میں کہا گیا کہ اگر عمران خان کو کچھ ہوا تو میں خودکش حملہ کروں گا۔
انہوں نے مزید کہا تھا کہ عمران خان کےایک بال کو بھی نقصان ہوا تو ملک چلانے والے سن لیں آپ رہیں گے نا آپ کے بچے۔ اگر عمران خان کو کچھ ہوا تو میں خودکش حملہ کروں گا، اس طرح اور بھی ہزاروں خودکش حملہ آور تیار ہیں۔
ان کا یہ بھی کہنا تھا کہ آپ کیا سمجھتے ہیں کہ آپ کے ان ہتکھنڈوں کی وجہ سے پی ٹی آئی کے ورکرز ڈر جائیں گے تو یہ آپ کی بھول ہے۔
واضح رہے کہ چند روز قبل تحریک انصاف کے وائس چیئرمین شاہ محمود قریشی نے بھی ایک بیان میں کہا تھا کہ اگر حکومت نے عمران خان کو گرفتار کرنے کی کوشش کی پورے پاکستان سے سخت ردعمل آئے گا۔
جب کہ وزیر داخلہ رانا ثنا اللہ واضح کر چکے ہیں کہ عدالتی ضمانت ختم ہوتے ہی عمران خان کی سیکیورٹی پر مامور اہلکار ہی انہیں گرفتار کر لیں گے۔
