الیکشن کمیشن آف پاکستان نے الیکٹرانک ووٹنگ مشین کے معاملے پر مداخلت نہ کرنے کی تنبیہ کرتے ہوئے کہا کہ کچھ لوگوں کو ای وی ایم ٹیکنالوجی کا ادراک نہیں اس لیے غیر ذمہ دارانہ بیانات سامنے آرہے ہیں۔
تفصیلات کے مطابق الیکشن کمیشن آف پاکستان نے الیکٹرانک ووٹنگ مشین (ای وی ایم) سے متعلق بیانات پر ردعمل دیتے ہوئے کہا کہ الیکشن کمیشن کو پریشرائز کرنے کا سلسلہ بند ہونا چاہیے، الیکشن کمیشن بغیر کسی دباؤ کے اپنی آئینی اور قانونی ذمہ داری پوری کرے گا۔
الیکشن کمیشن کا کہنا ہے کہ وفاقی حکومت نے 2023ء میں عام انتخابات الیکٹرانک ووٹنگ مشین سے کروانے کا اعلان کیا لیکن حکومت تجربے کیلئے 50 مشینیں بھی نہیں دے رہی، وزیر شبلی فراز کہتے ہیں کہ واضح خصوصیات طے کریں، مشینیں لے لیں۔
ترجمان ای سی پی کا کہنا ہے تجرباتی استعمال کیلئے 17 دسمبرکو ووٹنگ، گنتی اور دوبارہ گنتی کی خصوصیات کی حامل 50 مشینیں مانگی گئیں، لیکن تاحال خط کا کوئی جواب ہی نہیں ملا۔
تاہم اس حوالے سے وزیر سائنس و ٹیکنالوجی شبلی فراز کا کہنا ہے کہ کمیشن تو مشین کی درکار خصوصیات بتانے کو ہی تیار نہیں، الیکشن کمیشن بتائے کون سی مشین چاہئے اور اس میں کیا ہونا چاہئے، جو مشین ہم نے بنائی ہیں وہ چاہیئے تو ہم سے مشینیں لے جائیں۔
