آسٹریلیا نے انگلینڈ کو تیسرے ٹیسٹ میچ میں عبرت ناک شکست دے کر انگلینڈ کو ایشز سیریز میں وائٹ واش کردیا ہے، برطانوی کپتان جو روٹ 80 رنز کے فرق سے سابق پاکستانی کپتان محمد یوسف کا ریکارڈ نہ توڑ سکے۔
تفصیلات کے مطابق آسٹریلیا نے انگلینڈ کو تیسرے ٹیسٹ میچ ایک اننگز اور 14 رنز سے شکست دے کر سیریز 3-0 سے اپنے نام کی ہے۔
برطانوی کپتان اس میچ میں سابق پاکستانی بیٹسمین محمد یوسف کا ایک سال میں سب سےزیادہ ٹیسٹ رنز اسکور کرنے کا ریکارڈ توڑنے کیلئے پرعزم تھے تاہم وہ آج کی اننگز کے بعد مجموعی طور پر سال میں 17سو8 رنز اسکور کرسکے ، محمد یوسف کا ریکارڈ ایک سال میں 17 88 رنز کا تھا۔
آج تیسرے ٹیسٹ میچ کے تیسرے دن کے کھیل کا آغاز انگلینڈ کے 31 رنز چار کھلاڑی آؤٹ سے شروع ہواتو بین اسٹوکس صرف 11 رنز کے انفرادی اسکور پر ہی پویلین لوٹ گئے جس کے بعد دن کے ابتدائی 16ا وورز میں ہی آسٹریلوی باؤلرز نے انگلینڈ کے تمام کھلاڑیوں پویلین بھجوادیا۔
آسٹریلیا کی جانب سے اسکاٹ بالینڈ نے تباہ کن بولنگ کرتے ہوئے صرف 4 اوورز میں 7 رنز کے عوض 6 برطانوی بیٹسمینوں کو پویلین بھیجا، انہوں نے اپنی بولنگ میں ایک اوور میڈن بھی کیا۔
لڑکھڑاتی بیٹنگ کو برطانوی کرکٹ ٹیم کے کپتان جو روٹ جیسے تیسے 56 کے مجموعی سکور تک پہنچانے میں کامیاب ہوئے اور 28 کے انفرادی اسکور پر ڈیوڈ وارنر کے ہاتھوں کیچ آؤٹ ہوگئے۔
ایشز سیریز میں برطانیہ کو وائٹ واش کرنے کے بعد آسٹریلیا کرکٹ ٹیم آئی سی سی ٹیسٹ رینکنگ میں 36 پوائنٹس کے ساتھ پہلے نمبر پر رہی جبکہ انگلینڈ کی ٹیم ساتویں نمبر پر آگئی ہے۔