دنیائے کرکٹ کی مقبول ترین سیریز ایشز کے دوران کمنٹیٹرز بابراعظم کا ذکر کرکے ان کی تعریف کرتے رہے۔
تفصیلات کے مطابق انگلینڈ اور آسٹریلیا کے درمیان ایشز سیریز کا پہلا ٹیسٹ میچ جاری تھا کہ ایک موقع پر آسٹریلیوی کمنٹیٹر نے پاکستانی کرکٹ ٹیم کے کپتان بابراعظم کا ذکر چھیڑ دیا جس پر کمنٹری باکس میں موجودسابق آسٹریلیوی کرکٹر کیری او کیف نے بابراعظم کی تعریفوں کے پل باندھ دیئے۔
ٹویٹر پر میچ کا یہ کلپ تیزی سے وائرل ہورہا ہے جس میں کمنٹیٹرز کو میچ کے بجائے بابراعظم کی صلاحیتوں پر گفتگو کرتے باآسانی سنا جاسکتا ہے۔
آسٹریلوی کمنٹیٹر کیری او کیف سے کہتے ہیں کہ ہم سب یہ جانتے ہیں کہ آپ بابراعظم کو بے حد پسند کرتے ہیں اور جب جب بابراعظم کا نام لیا جاتا ہے آپ کے چہرے پر مسکراہٹ آجاتی ہے۔
کیری او کیف نے کمنٹیٹر کی اس بات پر اعتراف کرتے ہوئے کہا کہ میری خواہش ہے میں اپنی زندگی میں بابراعظم کو 20 گیندیں کھیل کر صفر رنز بناتے دیکھوں میں اس وقت بھی بابراعظم کی تعریف کرتےہوئے کہوں گا کہ یہ ایک بہترین اننگز تھی۔
انہوں نے کہا کہ میں اس 20 گیندوں پر صفر کو بھی کہوں گا کہ کیا اسٹائلش اور بہترین صفر ہے۔
