وفاقی تحقیقاتی ایجنسی(ایف آئی اے) نے وزیراعظم شہباز شریف، وزیراعلی پنجاب حمزہ شہباز سمیت دیگر ملزمان کے خلاف کیسز کو ختم کرنے یا واپس لینے سے متعلق خبروں کی تردید کردی ہے۔
تفصیلات کے مطابق ایف آئی اے لاہور کی جانب سے سوشل میڈیا سمیت دیگر پلیٹ فارمز پر گردش کرنےوالی خبروں کی تردید آئی ہے، ان خبروں میں دعویٰ کیا گیا تھا کہ ایف آئی اے نے ایف آئی اے نے شہباز شریف اور حمزہ شہباز کے خلاف منی لانڈرنگ کیس کی پیروی سے انکار کردیا ہے۔
ایف آئی اے کی جانب سے جاری کردہ اعلامیہ میں کہا گیا ہے کہ ایف آئی اے میں ٹرانسفر پوسٹنگز کی وجہ سے معاملہ الجھ کررہ گیا، جس کی وجہ سے تحقیقات میں تھوڑا بہت خلل ضرور آیا ہے مگر کسی بھی کیس کو واپس نہیں لیا گیا۔
ایف آئی اے نے ان خبروں کو فیک نیوز قرار دیتے ہوئے اعلامیہ میں کہا کہ ایف آئی اے لاہور نے کوئی کیس واپس نہیں لیا، سیاسی شخصیات کے خلاف کوئی کیس واپس نہیں لیا، منی لانڈرنگ سے متعلق کیسز عدالت میں زیر سماعت ہیں، ایک کیس کی اگلی سماعت14 مئی کو ہے۔
اعلامیہ میں مزید کہا گیا ہے کہ11 اپریل کو پراسیکیوٹر کی تبدیلی کے حوالے سے استغاثہ نے اپنی رائے پر مبنی ایک درخواست عدالت میں جمع کروائی تھی جس میں استغاثہ کی جانب سے عدالت پیشی سے متعلق ہدایات دی گئی تھیں، یہ کیس واپسی کی درخواست نہیں تھی اور جس وقت یہ درخواست جمع کروائی گئی جب میاں شہباز شریف ملک کے وزیراعظم نہیں بنے تھے اور نہ ہی موجودہ ڈی جی ایف آئی اے کی اس عہدے پر تعیناتی ہوئی تھی۔