سابق وزیراعظم عمران خان نے الزام عائد کیا ہے کہ ماضی میں میری کردار کشی کیلئے ریحام خان کو پیسے دیئے گئے اور میرے خلاف کتاب لکھوائی گئی۔
خبررساں ادارے کی رپورٹ کے مطابق سابق وزیراعظم عمران خان نے اپنی سابقہ اہلیہ ریحام خان کی جانب سے لکھی گئی کتاب کے حوالے سے پہلے بار اپنا ردعمل دیدیا ہے، انہوں نے ملتان میں ایک ورکرز کنونشن سے خطاب کرتے ہوئےریحام خان کا نام لیے بغیر کہا کہ شریف خاندان نے 2018 کے انتخابات سے قبل ایک خاتون کو میرے خلاف کتاب لکھنے کیلئے پیسے دیئے۔
عمران خان نے مزید کہا کہ انتخابات سے چند روز قبل میرے خلاف یہ کتاب شائع ہوئی، یہ مافیا عید الفطر کے بعد ایک بار پھر میری کردار کشی کی مہم شروع کرنے کا ارادہ رکھتا ہے، میرا ان لوگوں کیلئے پیغام ہے کہ میں ان سے اپنی زندگی کی آخری سانس تک لڑوں گا، میں ایسے مافیاز کے خلاف آواز اٹھاتا رہوں گا۔
سابق وزیراعظم نے کہا کہ اسی شریف مافیا نے ماضی میں سابق وزیراعظم بینظیر بھٹو کی جعلی تصاویر ایک جہاز کے ذریعے لاہور شہر میں پھیلائیں، جمائما کے حوالے سے شریف خاندان نے ایک پوری مہم تیار کی اور انہیں یہودی لابی کا حصہ قرار دینے کی کوشش کی ، ان کی اس مہم کی وجہ سے جمائما کو مختلف کیسز کا سامنا کرنا پڑا۔
تقریر کے دوران عمران خان نے بیرونی سازش کے نتیجے میں ان کے حکومت کے خاتمے کے معاملے پر تحقیقات کیلئے جوڈیشل کمیشن بنانے کے حوالے صدر مملکت اور چیف جسٹس آف پاکستان سے رجوع کرنے کا بھی اعلان کیا ۔