بھارتی ٹویٹر صارفین نے اپنے ہی مشہور فلمی ہیرو شاہ رخ خان کے خلاف بائیکاٹ کا ٹرینڈ چلادیا ہے جس کے پیچھے ان کی ماضی میں عمران خان کے ساتھ لی گئی ایک تصویر بنی ہے۔
میڈیارپورٹس کے مطابق بالی ووڈ کنگ خان کی 2008 میں عمران خان کے ساتھ ایک تقریب میں لی گئی ایک تصویر ٹویٹر پر وائرل ہورہی ہے جس کے ساتھ ہی بھارتی صارفین کی جانب سے چلایاگیا بائیکاٹ شاہ رخ خان کا ہیش ٹیگ بھارت میں ٹاپ ٹرینڈ کرنے لگا۔
بھارتی صارفین کے غصے کی وجہ یہ تصویر ہی نہیں کنگ خان کی نئی آنے والی فلم کا نام ہے جسے بھارتی صارفین ہضم نہیں کرپارہے۔
شاہ رخ خان کی نئی فلم"پٹھان" جلد ہی ریلیز کیلئے پیش کردی جائے گی جس میں شاہ رخ خان بھارتی خفیہ ایجنسی را کے ایجنٹ کے روپ میں دکھائی دیں گے، اس فلم میں شاہ رخ خان کے علاوہ بالی ووڈ ڈمپل کوئین دیپیکا اور جان ابراہم جلوہ گر ہوں گے۔
بھارتی صارفین اس فلم کے نام پر شدید نالاں نظر آتے ہیں ، صارفین کا کہنا ہے کہ شاہ رخ خان ایک ایسے نظریے کو فروغ دے رہے ہیں جو ناقابل برداشت ہے اور معاشرے کیلئے نقصان دہ ہے۔
سشما روہت نامی ایک صارف نے کہا کہ شاہ رخ خان کا بائیکاٹ ہونا چاہیے، کیونکہ وہ ایسی سوچ کو فروغ دے رہے ہیں جو نہ صرف معاشرے بلکہ انسانیت کیلئے بھی نقصان دہ ہے۔
اکشے پاٹیل نے کہا کہ شاہ رخ خان نے ہندو بادشاہ اشوکا کو ایک برے روپ میں دکھایا، ایک طرف جہاں اجے دیوگن اور اکشے کمار تنہاجی اور پرتھوی راج چوہان پر فلمیں بنارہے ہیں شاہ رخ خان "پٹھان " پر فلم بنارہے ہیں ، اگر یہ ایک جاسوسی ایجنٹ کی کہانی پر مبنی فلم ہے تو اس کا نام کسی ہندو نام پر کیوں نہیں رکھا جاسکتا؟ بھارت میں پٹھان کی ہی واہ واہ کیوں؟
ایک اور بھارتی صارف نے لکھا کہ کون سے پٹھان تعریف کے قابل ہیں؟ جو آپس میں لڑرہے ہیں؟ جو اپنی ماؤں بہنوں اور اپنے سگے بھائیوں کو قتل کرتے ہیں؟
شاہ رخ خان کی جانب سے بھارت کو ناقابل برداشت کہنے اور انڈین پریمئر لیگ میں پاکستانی کھلاڑیوں کی شمولیت کے حق میں دیئے گئے بیان پر ایک صارف نے ردعمل دیتے ہوئے کہا کہ شاہ رخ بھارت کو ناقابل برداشت کہہ رہے ہیں جب بھارت میں رہنے والے ہر مسلمان کو مکمل آزادی حاصل ہے۔
بھارتی صارفین کی جانب سے شاہ رخ خان کی عمران خان کے ساتھ تصویر، انڈین پریمئر لیگ میں پاکستانی کھلاڑیوں کی شمولیت کے حق میں دیا گیا بیان اور ان کی آنے والی فلم کے نام پٹھان سے بھارتی صارفین تلملائے ہوئے دکھائی دے رہے ہیں اور اپنےہی اسٹار کو پاکستان کے حمایتی قرار دیتے ہوئے ان کے بائیکاٹ کے ٹرینڈ چلارہے ہیں۔