بھارتی حکومت نے پاکستان پر ناکام حملہ میں ناکام ہوکر پاک فضائیہ کے ہاتھوں گرفتار ہونے والے پائلٹ ابھی نندن کو اپنے ملک کے تیسرے بڑے فوجی اعزاز 'ویر چکرا'سے نواز دیا ہے۔
تفصیلات کے مطابق بھارتی حکومت نے اپنی فضائیہ کے ونگ کمانڈر کو یہ اعزاز دینے کی جو وجہ بتائی ہے وہ مضحکہ خیز ہے، بھارتی میڈیا کے مطابق ابھی نندن کو یہ اعزاز پاکستانی ایئر فورس کے طیارے ایف 16 کو مار گرانے پر دیا جارہا ہے۔
ابھی نندن جنہیں حال ہی میں بھارتی فضائیہ میں ترقی دے کر ونگ کمانڈر سے گروپ کیپٹن بنایا گیا ہے کو بھارتی صدر رام ناتھ کووند نے اس اعزاز سے نوازا اور ابھی نندن کی صلاحیتوں کو سراہا۔
واضح رہے کہ جس واقعے ابھی نندن کو اس اعزاز سے نواز اگیا ہے وہ 2سال قبل 26فروری کو رونما ہوا جس کے حوالے سے بھارتی میڈیا اور حکومت یہ دعویٰ کرتا ہے کہ ابھی نندن نے
پاکستان پر ایئر سٹرائیک کے دوران پاک فضائیہ کے ایف 16 طیارے کو تباہ کیا۔
ابھی نندن کو اعلیٰ ایوارڈملنے پرپاکستانیوں نے بھی سوشل میڈیا پر محاذ سنبھال لیا اور دلچسپ تبصروں کی برسات کر دی۔
کاشف ظہیر نے ابھی نندن کو جے ایف 17 طیارے کا برانڈ ایمبیسڈر قرار دیتے ہوئے ان کا شکریہ ادا کیا۔
زاکر علی نے سوالیہ انداز میں پوچھا ابھی نندن آپ کی یونیفارم کہاں ہے اس وقت۔
راجہ عثمان نے کہا کہ لائف میں اتنا کانفیڈینس چاہیے کہ بندہ جوتیاں چپڑیں کھاکر ملین ڈالر کی چائے پی کر بھی سینہ تان کر ایوارڈ لینے کھڑا ہو۔
حقیقت یہ ہے کہ امریکی خبررساں ادارے فارن پالیسی نے بھی اپنی رپورٹ میں تسلیم کیا کہ پاک فضائیہ کے ایف 16 طیاروں کی تعداد پوری ہے، تاہم بھارتی فوج کے جس طیارے کو ابھی نندن اڑارہے تھے اسے پاک فوج کے جوانوں نے ہوا میں تباہ ضرور کردیا تھا جس کے بعد ابھی نندن کو پاک فوج نے پاکستانی حدود میں زخمی حالت میں گرفتار کیا اور 60 گھنٹے تک پاکستانی قید میں رہے اور بعد میں انہیں واہگہ بارڈر کے راستے بھارتی بھجوادیا گیا۔