آئی ایس آئی کے سابق سربراہ لیفٹیننٹ جنرل (ر) ظہیر الاسلام نے کہا ہے کہ انہوں نے پی ٹی آئی میں شمولیت اختیار کی نہ انہوں نے عمران خان سے ملاقات کی۔
دی نیوز سے منسلک صحافی انصار عباسی نے ایک خبر میں دعوی کیا ہے سابق آئی ایس آئی چیف کا کہنا ہے کہ انہوں نے اپنے آبائی گائوں کہوٹا میں مقامی افراد اور بزرگوں سے ملاقات کی جس میں کمیونٹی نے آئندہ ضمنی انتخاب میں پی ٹی آئی کے پی پی 7 راولپنڈی کے امیدوار کی حمایت کا فیصلہ کیا۔
انہوں نے کہا کہ یہ برادری کا فیصلہ تھا اور اس کا حصہ ہونے کی حیثیت سے میں نے فیصلے کا اعلان کیا۔ تاہم یہ بھی واضح کیا کہ اجلاس میں ان کی موجودگی کو سوشل میڈیا پر غلط رنگ دے کر پیش کیا گیا ہے۔ کیونکہ جنرل ظہیر نے نہ تو پی ٹی آئی میں شمولیت اختیار کی نہ عمران خان سے ملاقات کی ہے۔
لیفٹننٹ جنرل ریٹائرڈ ظہیرالسلام نے کہا ان کی گزشتہ چند سال سے عمران خان سے ملاقات نہیں ہوئی، کم از کم ان کے وزیراعظم بننے کے بعد سے تو بالکل نہیں۔ لیکن مستقبل میں پی ٹی آئی میں شمولیت اختیار کرنے کے حوالے سے سوال پر کہا کہ وہ مستقبل کے بارے میں کچھ نہیں کہہ سکتے۔
یاد رہے کہ جنرل ظہیر کی کہوٹا میں پی ٹی آئی کے اجلاس میں شرکت کی تصویریں سوشل میڈیا پر وائرل ہوگئیں۔ سوشل میڈیا صارفین نے جنرل ظہیر کا پی ٹی آئی میں شمولیت پر خیر مقدم کیا اور وہ تصاویر شیئر کیں جن میں ظہیر کو پی ٹی آئی کے لوگوں کے ساتھ بات چیت کرتے دیکھا جا سکتا ہے۔