پاکستان پیپلزپارٹی کے چیئرمین بلاول بھٹو زرداری نےوزیراعظم عمران خان کی جانب سے جلسے میں فوج کا حوالہ دینے کو قابل رحم اورمایوس کن قرار دے دیا، کہتے ہیں جلسے میں فوج کا حوالہ دینا کام نہیں آئےگا۔
تفصیلات کے مطابق پیپلزپارٹی کے چیئرمین بلاول بھٹو زرداری نے وزیراعظم عمران خان کے لوئردیر میں خطاب پر اپنے ردعمل کا اظہار کرتے ہوئے اپنے ٹوئٹر پیغام میں کہا کہ کیا آپ نے کبھی کسی جیتنے والے کپتان کو اپنے مخالفین کو مغلظات نوازتے سنا ہے؟ مخالفین کو مغلظات جیتنے والے کپتان نہیں بلکہ ایسا توشکست خوردہ عناصر کرتے ہیں، اس وقت جب عدم اعتماد زیر التوا ہے، جلسے میں فوج کا حوالہ دینا مایوس کن ہے اور یہ کام نہیں آئے گا۔
واضح رہے وزیراعظم عمران خان نے لوئر دیر میں جلسے سے خطاب کرتے ہوئے کہا کہ جنرل باجوہ نے کہا کہ مولانا فضل الرحمان کو ڈیزل نہ کہنا ، میں نے آرمی چیف سے کہا عوام نے فضل الرحمان کا نام ڈیزل رکھا ہے، لوگ مجھے یہ بھی کہتے ہیں نواز شریف کو بھگوڑا مت کہیں۔
اس کے ردعمل میں پاکستان ڈیموکریٹک موومنٹ کے صدر مولانا فضل الرحمان نے میڈیا سے گفتگو میں ایک سوال پر کہا کہ میں نے جنرل باجوہ کو کسی کی کوئی شکایت نہیں لگائی، میں نے شکایت لگانے والی سیاست کبھی نہیں کی، سول کی طرح ملٹری بیوروکریسی قابل احترام ہے، ہم صرف یہ چاہتے کہ اپنے آئینی دائرہ اختیار میں رہیں ۔
انہوں نے کہا کہ اگرآج ملٹری بیوروکریسی کہتی کہ ہم غیرجانبدار ہیں ہمارا سیاست سے کوئی تعلق نہیں تو اس کے جواب میں وہ کہتا ہے کہ نیوٹرل تو جانور ہوتا ہے۔
