وزیراعظم شہباز شریف کے ہمراہ سعودی عرب کا دورہ کرنے والے کابینہ ارکان کو ملنے والے تحائف کی تفصیلات منظر عام پر آگئی ہیں۔
تفصیلات کے مطابق دورہ سعودیہ کے موقع پر سعودی حکومت کی جانب سے وزیراعظم پاکستان شہباز شریف کو قیمتی گھڑی، انگوٹھی،ا سٹڈ ، ایک عددقیمتی قلم، سونے اور ہیروں سے بنی تسبیح، خالص زیتون کا تیل اور خالص کھجوریں تحفے میں دی گئیں۔
اسی طرح وزیر خارجہ بلاول بھٹو زرداری کو رولیکس کی ایک عدد گھڑی کے علاوہ خالص زیتون کا تیل ، شہد اور اچھی کوالٹی کی کھجوریں تحفے میں ملیں یہی سب کچھ وزیرخزانہ مفتاح اسماعیل کو بھی سعودی حکومت کی جانب سے تحفہ میں دیا گیا۔
اسی طرح وفاقی وزیر دفاع خواجہ آصف،وفاقی وزیر شاہ زین بگٹی ، چوہدری سالک ،وفاقی وزیر اطلاعات مریم اورنگزیب سیکرٹری خارجہ سہیل محمود اور مولانا طاہر اشرفی کو بھی ایک قیمتی گھڑی، شہد ، خالص زیتون کا تیل اور عمدہ کھجوروں کا تحفہ ملا۔
اے آروائی نیوز کے پروگرام پاورپلے میں گفتگو کرتے ہوئے سینئر تجزیہ کار ارشد شریف نے بتایا کہ دورہ سعودیہ عرب ویسے تو معاشی صورتحال کیلئے کسی بیل آؤٹ پیکج کیلئے تھا ، اس بیل آؤٹ پیکج کی تو کوئی تفصیل ابھی تک سامنے نہیں آئی تاہم وفد کو ملنے والے تحائف کی تفصیلات سامنے آگئی ہیں۔
انہوں نے بتایا کہ ان تحائف کے حوالے سے مریم اورنگزیب کو ن لیگ کے حوالے سے اور فیصل کریم کنڈی کو پیپلزپارٹی کے حوالے سے سوالات بھیجے کہ کیا کابینہ ارکان نے یہ تحائف توشہ خانہ میں جمع کروادیئے ہیں یا ان کےبدلے رقوم دے کر یہ تحائف رکھ لیے گئے ہیں؟
ارشد شریف نے کہا کہ ن لیگ اور پیپلزپارٹی رہنماؤں کی جانب سے ہمارے نمائندے کے سوالات پر تاحال کوئی جواب نہیں دیا گیا ہے۔