سپریم کورٹ آف پاکستان میں حکومت کی جانب سے لانگ مارچ کو روکنے کیلئے راستوں کی بندش، سیاسی کارکنان کی گرفتاریوں کے خلاف درخواست سماعت کیلئے مقرر کردی گئی ہے۔
خبررساں ادارے کی رپورٹ کے مطابق اسلام آباد ہائی کورٹ بار ایسوسی ایشن نے پاکستان تحریک انصاف کے لانگ مارچ کو روکنے کے حکومتی فیصلے اور اس کے تحت راستوں کو بند کرنے، سیاسی گرفتاریوں کیلئے چھاپے مارنے کے فیصلے کے خلاف سپریم کورٹ میں درخواست دائر کی تھی۔
سپریم کورٹ نے بار ایسوسی ایشن کی اس درخواست کو سماعت کیلئے مقرر کرتے ہوئے آج کی تاریخ دیدی ہے، درخواست پر سماعت جسٹس اعجاز الاحسن، جسٹس منیب اختراور جسٹس مظہر علی اکبر پر مشتمل تین رکنی بینچ کرے گا۔
واضح رہے کہ پاکستان تحریک انصاف نے اپنی حکومت گرائے جانے اور موجودہ حکومت کے خاتمے کیلئے 25 مئی کو اسلام آباد کی طرف آزادی مارچ کا اعلان کیا ہے،
وفاقی و پنجاب حکومت نے تحریک انصاف کے اس مارچ کو روکنے کا فیصلہ کیا ہے جس کے بعد پنجاب میں مختلف مقامات کو سیل کردیا گیا ہے اور موبائل فون سروس بھی معطل کرنےکے احکامات جاری کردیئے گئے ہیں۔