وفاقی بورڈ آف ریونیو( ایف بی آر ) نے پوائنٹ آف سیل سے خریداری کو فروغ دینے کیلئے انعامی سکیم شروع کردی ہے۔
مائیکرو بلاگنگ ویب سائٹ ٹویٹر پر ایف بی آ ر کے ترجمان کی جانب سے اس مہم کیلئے بنائے گئے ویڈیو ایڈ اور اخباری اشتہارات کے نمونے شیئر کیے گئے جس میں ایف بی آر نے لوگوں کو ویری فائیڈ پی او ایس آؤٹ لیٹس سے خریداری کی ترغیب دی ہے اور عوام میں اس رجحان کو پیدا کرنے کیلئے 10 لاکھ روپے تک کا انعام بھی رکھا ہے جو قرعہ اندازی کے ذریعے خوش قسمتوں کو دیا جائے گا۔
اشتہار میں عوام سے ویری فائیڈ پی او ایس آؤٹ لیٹس سے خریداری، پکی رسید کی وصولی اور رسید کو تصدیق کرنے کے حوالے سے تمام معلومات فراہم کی گئی ہیں۔
ویڈیو ایڈ کو شیئر کرتے ہوئے ترجمان ایف بی آر کا کہنا تھا کہ کافی عرصے سے انتظار کے بعد پاکستان کے تمام مین سٹریم ٹی وی چینلز پر اگلے 2 ماہ کیلئے یہ اشتہار چلائے جائیں گے۔
ایف بی آر نے عوام سے درخواست بھی کی کہ یہ اہم معلومات اپنے حلقہ احباب اور سے شیئر کریں اور انہیں بھی پی او ایس پرائز اسکیم میں حصہ لے کر لاکھوں روپے کے انعامات جیتنے کا موقع فراہم کریں۔
یادرہے کہ گزشتہ روز ایف بی آر کے ترجمان نے اخباری اشتہارات بھی ٹویٹر پر شیئر کیے تھے اور کہا تھا کہ اس مہم کا مقصد ریئل ٹائم مانیٹرنگ کے اس نظام کو لاکر شفافیت کے دائرے کو پھیلانا اور ملکی آمدن کی لیکج کو روکنا ہے۔
ایف بی آر کے مطابق اس مہم کا ایک اور مقصد عوام سے ریٹیل کاؤنٹرز پر لیے گئے سیلز ٹیکس کو قومی خزانے میں جمع کروائے جانے کو یقینی بنانا بھی ہے۔
