ملک میں معاشی سرگرمیوں میں ایک بار پھر منفی رجحان دیکھا جارہا ہے، ایک طرف ڈالر کے مقابلے میں روپے کی قدر میں کمی ریکارڈ کی گئی تو دوسری جانب اسٹاک مارکیٹ بھی شدید مندی کا شکار ہوگئی ہے۔
تفصیلات کے مطابق آج انٹر بینک مارکیٹ میں ڈالر کے مقابلے میں روپے کی قدر میں صفر اعشاریہ23 فیصد کمی دیکھی گئی جبکہ اسٹاک مارکیٹ میں بھی صفر اعشاریہ 62 فیصد منفی کاروباری رجحان رہا۔
مائیکروبلاگنگ ویب سائٹ ٹویٹر پر اسٹیٹ بینک آف پاکستان کی جانب سے جاری کردہ اعدادوشمار کے مطابق گزشتہ روز جو امریکی ڈالر 185 روپے 45 پیسے میں فروخت ہورہا تھا آج اس میں 42 پیسے کا اضافہ ہوا ہے اور ڈالر مزید مہنگا ہونے کے بعد 185 روپے87 پیسے کی سطح پر ٹریڈ ہوا۔
دوسری جانب کراچی اسٹاک مارکیٹ میں بھی آج سرمایہ کاروں کیلئے ایک برا دن رہا، پورے دن کے دوران ہنڈرڈ انڈیکس میں 283 سے زائد پوائنٹس کی کمی سے سرمایہ کاروں کواربوں کا نقصان اٹھانا پڑا ہے۔
کراچی اسٹاک مارکیٹ میں کاروبار شروع ہوا تو ہنڈرڈ انڈیکس45ہزار533اعشاریہ 30 پوائنٹس پر موجود تھا جس میں پورے دن کے دوران ایک پوائنٹ کا بھی اضافہ ریکارڈ نہیں کیا گیا، ایک موقع پر انڈیکس44ہزار 656 اعشاریہ 96 پوائنٹس کی سطح تک گر بھی گیا۔
تاہم کاروبار کے اتار چڑھاؤ کے بعد انڈیکس 283اعشاریہ 89 پوائنٹس کمی کے بعد 45ہزار249 اعشاریہ41 پوائنٹس کی سطح پر بند ہوا۔
