انٹربینک مارکیٹ میں روپے کے مقابلے میں امریکی ڈالر سستا ہوگیا ہے۔
مائیکروبلاگنگ ویب سائٹ ٹوئٹر پر اسٹیٹ بینک آف پاکستان کی جانب سے ایکسچینج ریٹ کیلئے انٹربینک مارکیٹ کے اعدادوشمار کی تفصیلات جاری کی گئیں۔
اسٹیٹ بینک کے مطابق آج انٹر بینک میں کاروبار شروع ہوا تو امریکی ڈالر176 روپے92 پیسے کا تھا تاہم پورے دن کاروبار کے بعد امریکی ڈالر کی قدر میں پچیس پیسے کی کمی واقع ہوئی جس کے بعد کاروبار کے اختتام پر ڈالر176 روپے 67 پیسے کی سطح پر بند ہوا۔
دوسری جانب حصص کی منڈیوں میں بھی آج مثبت رجحان دیکھا گیا ہے، کراچی اسٹاک مارکیٹ سے بھی اچھی خبریں آرہی ہیں جن کے مطابق آج کاروبار کے دوران ہنڈرڈ انڈیکس میں ڈھائی سو سے زائد پوائنٹس کا اضافہ ریکارڈ کیا گیا ہے۔
کراچی اسٹاک مارکیٹ میں آج کاروبار کےد وران مجموعی طور پر صفر اعشاریہ 58 فیصد بہتری دیکھی گئی، کاروبار کے اختتام پر ہنڈرڈ انڈیکس میں 263 اعشاریہ35 پوائنٹس اضافے کے بعد 45ہزار345اعشاریہ65 پوائنٹس کی سطح پر بند ہوا۔
حالیہ اضافے کے بعد مارکیٹ کا مجموعی حجم 5ارب87کروڑ55 لاکھ8ہزار714 تک پہنچ گیا ہے۔