پاکستانی ڈرامہ و فلم انڈسٹری کی مشہور اداکارہ ثناء جاوید اس وقت سوشل میڈیا تنقید کی زد میں آئی ہوئی ہیں، صارفین ان پر پابندی کامطالبہ کررہے ہیں۔
تفصیلات کے مطابق ثناء جاوید کے خلاف اس مہم کا آغاز اس وقت ہوا جب فیشن ماڈل منال سلیم نے انسٹاگرام پر نام لیے بغیر پوسٹ کی اور کہا کہ وہ مزیدکسی اداکارہ یا سیلبرٹی کے ساتھ کام نہیں کریں گی اور کوئی کلائنٹ انہیں ایسا کرنے کی درخواست بھی نہ کرے۔
منال سلیم نے کہا کہ میرے اس فیصلے کی وجہ یہ ہے کہ ادکارائیں ہمیں "دو ٹکے کی ماڈلز" سمجھتی ہیں، انہیں یہ میرے منہ پر کہنے کی ہمت بھی ہونی چاہیے، ہم کام کرنے آتے ہیں مفت میں ذلیل ہونے کیلئے نہیں۔
منال سلیم کی پوسٹ سے لوگوں کو یہ سمجھ نہیں آرہی تھی کہ وہ کس اداکارہ کے بارے میں بات کررہی ہیں مگر ان کی پوسٹ کے بعد متعدد میک اپ آرٹسٹ نے بھی ایسے ہی پیغامات شیئر کیے جس میں اداکاراؤں کی جانب سے برے رویوں کا انکشاف کیا گیا۔
انہی میک اپ آرٹسٹس نے یہ بھی واضح کیا کہ منال سلیم کےساتھ یہ رویہ ثناء جاوید نے اپنایا ہے اور یہ پہلا موقع نہیں ہے جب ثناء جاوید نے کسی کے ساتھ بدتمیزی کی ہو بلکہ ان تمام لوگوں نے ثنا ء جاوید کے ساتھ اپنے برے تجربات شیئر کیے اور ثناء جاوید کو غیر پیشہ ورانہ اداکارہ قرار دیا۔
ماڈل فریحہ شیخ نے ثناء جاوید کے منفی رویئے اور اُن کے ساتھ کام کرنے کے دوران برے تجربے سے متعلق اپنی پوسٹ پر تفصیل سے بات کی ہے۔
فریحہ شیخ نے اپنے ساتھ پیش آنے والے واقعے سے متعلق بات کرتے ہوئے بتایا کہ ثناء جاوید اپنے سامنے کسی اور فنکار کو دیکھنا بھی پسند نہیں کرتی ہیں اور اُنہیں خصوصی پروٹوکول کی ضرورت ہوتی ہے، وہ دوسروں کو حقارت کی نظر سے دیکھتی ہیں۔
سوشل میڈیا پر اس تنازعے کے بعد سوشل میڈیا صارفین نے منال سلیم کے ساتھ اظہار یکجہتی کرتے ہوئے ثناء جاوید پر پابندی کا مطالبہ کرنا شروع کردیا ہے، صارفین کا کہنا ہے کہ ثنا ء جاوید کو ساتھ فنکاروں کے ساتھ بدتمیزی اور برے رویے سے پیش آنے پر معذرت کرنی چاہیے۔
