معروف ٹک ٹاکر بھولا ریکارڈ کیخلاف لاہور پولیس کی جانب سے مقدمہ درج کیا گیا ہے۔ خاتون نے لاہور کے تھانہ غالب مارکیٹ میں درج کروائی گئی ایف آئی آر میں الزام عائد کیا ہے کہ نبیل اکرم عرف بھولا ریکارڈ نے اسے گلبرگ کے ہلٹن ہوٹل میں بلا کر زیادتی کا نشانہ بنا ڈالا۔
متاثرہ خاتون نے مؤقف اپنایا ہے کہ اس کا بھولا ریکارڈ کے ساتھ فون پر رابطہ تھا، ملزم نے اسے کسی کام کے بہانے ہوٹل بلایا جہاں اسے زیادتی کا نشانہ بنا ڈالا اور منہ بند رکھنے کیلئے سنگین نتائج کی دھمکیاں دی ہیں۔ خاتون کی جانب سے درج کرائی گئی ایف آئی آر زنا بالجبر کی دفعات کے تحت درج کی گئی ہے۔
نجی ٹی وی چینل لاہور نیوز کی رپورٹ کے مطابق پولیس نے لڑکی کی شکایت پر بھولا ریکارڈ کیخلاف ایف آئی آر درج کرنے کے بعد بیان جاری کیا ہے کہ اس معاملے کی تحقیقات جاری ہیں۔ دوسری جانب ٹک ٹاکر نبیل اکرم عرف بھولا ریکارڈ نے زیادتی کے الزام میں مقدمہ درج ہونے کے بعد سوشل میڈیا پر جاری پیغام میں الزامات کی تردید کی۔
بھولا ریکارڈ کا کہنا ہے کہ یہ تمام معاملہ اسکینڈل بنانے کی کوشش ہے، ایف آئی آر درج کروانے والی خاتون نامی گرامی بندوں کو بلیک میل کرتی ہے۔ اس عورت نے پہلے شیخ رشید اور مفتی قوی کیخلاف بھی اسکینڈل بنایا تھا۔ یہ عورت خود رکشے پر بیٹھ کر میرے پاس ہوٹل آئی تھی اور آ کر کہا کہ مجھ سے شادی کرنا چاہتی ہے۔
ملزم بھولا ریکارڈ کا اپنے ویڈیو بیان میں کہنا ہے کہ بعد ازاں خاتون واپس چلی گئی اور پھر 24 گھنٹے بعد زیادتی کا الزام عائد کر دیا۔ خاتون جب میرے پاس ہوٹل میں آئی تو میں نے اس کی عزت کی وہاں ٹک ٹاک کی ویڈیوز بنائی تھیں۔ خاتون صبح ساڑھے 8 بجے میرے پاس آئی اور ایک گھنٹے بعد واپس چلی گئی تھی۔
بھولا ریکارڈ کا کہنا ہے کہ ہوٹل سے جانے کے 24 گھنٹے بعد اسے زیادتی کا مقدمہ درج کرانا یاد آیا۔ اس خاتون کی یوٹیوب پر ویڈیوز موجود ہیں یہ پہلے بھی لوگوں کو بلیک بلیک کرتی رہی ہے۔ اس تمام معاملے سے یہ خاتون مشہور ہونا چاہتی ہے۔
