پاکستان تحریک انصاف کے رہنما عثمان ڈار نے سیالکوٹ کینٹ کے انتخابات میں مبینہ دھاندلی کے شواہد پیش کردیئے ہیں۔
مائیکروبلاگنگ ویب سائٹ ٹویٹر پر اپنےبیان میں عثمان ڈار کا کہنا تھا کہ سیالکوٹ کینٹ میں الیکشن کمیشن کے عملے کو ن لیگ کے 3 اراکین کے ساتھ دھاندلی کی کوشش کرتے ہوئے رنگے ہاتھوں پکڑ لیا ہے۔
انہوں نے مزید لکھا کہ الیکشن کمیشن کا عملہ ہمارے کارکنان کے ووٹ بغیر تصدیق ایک جگہ سے دوسری جگہ منتقل کر رہا تھا، ووٹر لسٹ میں جسے مردہ قرار دیا گیا وہ شخص بھی موقع پر پہنچ گیا۔
عثمان ڈار نے الیکشن کمیشن آفس میں ہونے والی تکرار کی ایک ویڈیو بھی شیئر کی اور کہا کہ معاملے سے پارٹی چیئرمین عمران خان کو آگاہ کر دیا گیا ہے،خواجہ آصف اسی حلقے میں 2018 کا الیکشن چرا چکے ہیں۔
رہنما تحریک انصاف نے الزام عائد کیا کہ خواجہ آصف نے ایک بار پھر الیکشن کمیشن کے عملے کے ساتھ مل کر منظم دھاندلی کا منصوبہ بنایا ہے، جس کے ویڈیو ثبوت نہ صرف قوم کے سامنے رکھنے کا فیصلہ ہوا ہے بلکہ عدالت سے بھی رجوع کرینگے۔
ذرائع کے مطابق مختلف حلقوں سے ووٹوں کو دوسرے حلقوں میں منتقل کیے جانے کے شواہد بھی سامنے آگئے جس کے مطابق کونسلر زاہد شمسی کی تصدیق کے بعد یہ ووٹ منتقل کیے جارہے ہیں جو بعد میں الیکشن کمیشن سے مسترد ہوجاتے ہیں ۔