پاکستانی فاسٹ باؤلر شاہین شاہ آفریدی کو بنگلہ دیش کے بیٹسمین کو گیند مارنا مہنگا پڑگیا ہے، آئی سی سی نے باؤلر کی اس حرکت پر سخت ایکشن لے لیا ہے۔
خبررساں ادارے کی رپورٹ کے مطابق انٹرنیشنل کرکٹ کونسل نے شاہین آفریدی کی جانب سے باؤلر کو گیند مارنے پر جرمانہ عائد کردیا ہے۔
رپورٹ کے مطابق آئی سی سی نے شاہین آفریدی کے خلاف فیصلہ میں لکھا کہ پاکستانی باؤلر آئی سی سی کے کوڈ آف کنڈکٹ کے آرٹیکل دو اعشاریہ نو کی خلاف ورزی کے مرتکب قرار پائے ہیں، جس پر انہیں میچ فیس کا 15 فیصد جرمانہ عائد کیا گیا اور ان کی ڈسپلنری پروفائل میں ایک ڈی میرٹ پوائنٹ کا بھی اضافہ کردیا گیا ہے۔
یادرہے کہ بنگلہ دیش کے خلا ف دوسرے ٹی 20 میچ میں شاہین آفریدی نے بیٹسمین کی جانب سے کھیلی گئی شاٹ کو پکڑ کر واپس تھرو کیا، گیند سیدھی بنگلہ دیشی بیٹسمین عفیف کے ٹخنے پر لگی جس کی تکلیف سے وہ زمین پر گر گئے۔
ان کی تکلیف کو دیکھتے ہوئے فوری طور پر میڈیکل ٹیم کو بلوایا گیا جنہوں نے انہیں فوری طبی امداد دی جس کے بعد عافیف نے دوبارہ بیٹنگ شروع کی اور 20 رنز بنا کر شاداب خان کی گیند پر آؤٹ ہوگئے۔