وزیراعلی پنجاب حمزہ شہباز شریف نے شریف خاندان کی شوگر ملزم سے 70 روپے فی کلو چینی فراہم کرنے کا فیصلہ کیا ہے۔
خبررساں ادارے اے آروائی نیوز کی رپورٹ کے مطابق وزیراعلی حمزہ شہباز شریف کی شوگر ملز ایسوسی ایشن کے وفد سے ملاقات ہوئی جس میں چینی کی موجودہ قیمت کے تعین کیلئے مذاکرات کیے گئے۔
اس موقع پر ایسو سی ایشن کو 70 روپے فی کلو کے حساب سے چینی کی فروخت کی ہدایات جاری کی گئیں اور ایسوسی ایشن کو حتمی فیصلے کیلئے چوبیس گھنٹوں کا وقت بھی دیدیا گیا ہے۔
ق لیگ کے رہنما مونس الٰہی نے اس خبر پر تبصرہ کرتے ہوئے کہا کہ بچہ حکومت کی ایک اور بچوں والی حرکت۔ اپنی شوگر ملز کی چینی پہلے ہی بیچ دی تھی اور اب یہ ڈرامہ۔.
یادرہے کہ کچھ روز قبل وزیراعظم شہباز شریف نے چینی کی ایکسپورٹ پر پابندی عائد کرتے ہوئے عوام کی ضروریات کو اولین ترجیح بنانے کی ہدایات جاری کی تھیں۔
شہباز شریف نے متعلقہ اداروں کو چینی کی قیمت میں استحکام،اسمگلنگ ،ذخیرہ اندوزی، ناجائز منافع خوری کی روک تھام کرتے ہوئے مصنوعی قلت پیدا کرنے والے مافیا کے خلاف سختی سے نمٹنے کی بھی ہدایات دی تھیں۔
ٹویٹر پر اس حوالے سے شہباز شریف کی جانب سے ایک بیان بھی جاری کیا گیا جس میں کہا گیا تھا کہ ملک میں چینی کی طلب کو دیکھتے ہوئے ایکسپورٹ پر مکمل پابندی عائد کردی گئی ہے، ذخیرہ اندوزوں اور اسمگلنگ میں ملوث عناصر کے خلاف بھی کارروائی کا حکم دیدیا ہے، فرائض سے غفلت برتنے والوں کیلئے زیرو ٹالرینس پالیسی پر عمل کیا جائے گا۔