سرکاری ٹیلی وژن پی ٹی وی کے اسپورٹس اینکر کا سابق ٹیسٹ کرکٹر شعیب اختر کے ساتھ تضحیک آمیز رویے پر شہری نے ہائیکورٹ میں انکوائری کے لیے درخواست دائر کردی۔
تفصیلات کے مطابق شہری آفتاب احمد خان کی جانب سے ہائیکورٹ میں آئینی درخواست دائر کی گئی۔ شہری آفتاب احمد خان نے اپنی درخواست میں وفاقی حکومت، پیمرا، پی ٹی وی، ڈاکٹر نعمان نیاز سمیت دیگر کو فریق بنایا۔
درخواست میں موقف اپنایا گیا ہے کہ پاک بھارت فتح کے بعد پی ٹی وی پر لائیو پروگرام کے دوران یہ افسوسناک واقعہ پیش آیا، پروگرام کے میزبان نے قومی سٹار شعیب اختر کے ساتھ انتہائی تضحیک آمیز رویہ اختیار کیا تھا، پروگرام پوری دنیا میں دیکھا گیا جو پاکستان کی جگ ہنسائی کا باعث بنا جبکہ پیمرا کی جانب سے واقعے کا کوئی نوٹس نہیں لیا گیا۔
درخواست میں مزید بتایا گیا کہ شعیب اختر کے دنیا بھر میں کروڑوں کی تعداد میں مداح ہیں جو اس واقعہ پر مایوس ہوئے ہیں، پاکستان آرمی اور پی سی بی نے پاکستان میں کرکٹ واپس لانے کے لیے انتھک محنت کی، میزبان کے خلاف ابتک کوئی کارروائی نہیں کی گئی۔ شہری نے عدالت سے استدعا کی ہے کہ پی ٹی وی کی ابتدائی انکوائری رپورٹ پیش کرنے کا حکم دیا جائے۔
درخواستگزار نے مزید درخواست کی ہے کہ پیمرا اور وزارت اطلاعات میں زیرالتوا درخواست پر کارروائی کا حکم دیا جائے جبکہ اعلیٰ سطحی انکوائری کمیٹی بنا کر تحقیقات کروائی جائیں۔
واضح رہے کہ پی ٹی وی کے اسپورٹس شو ’گیم آن ہے‘ میں پاکستان کے نیوزی لینڈ سے میچ کے بعد جاری شو کے دوران میزبان کی جانب سے کی جانے والی بدتمیزی پر شعیب اختر نے پی ٹی وی کے شو سے استعفیٰ دے دیا تھا۔
اینکر کے نامناسب رویے پر شعیب اختر نے ردِ عمل دیتے ہوئے کہا تھا کہ سرکاری ٹی وی پر میزبان کا رویہ ناقابل برداشت تھا، دنیا بھر کے لیجنڈز کے سامنے یوں شو سے جانے کا کہنا توہین آمیز تھا۔
