پاکستان تحریک انصاف کی سینئر صوبائی ومرکزی قیادت اور عہدیداروں کے نام پر چلائے جانے والے 13 اکائونٹس کی تحقیقات کا فیصلہ کر لیا گیا ہے۔ آئندہ ہونے والے کابینہ کے اجلاس کے بعد پی ٹی آئی قیادت کے نام ایگزٹ کنٹرول لسٹ میں ڈالے جائیں گے۔
تفصیلات کے مطابق رہنما مسلم لیگ ن حنیف عباسی کا پریس کانفرنس کرتے ہوئے کہنا تھا کہ پاکستان تحریک انصاف کی سینئر صوبائی ومرکزی قیادت اور عہدیداروں کے نام پر چلائے جانے والے 13 اکائونٹس کی تحقیقات کا فیصلہ کر لیا گیا ہے۔ آئندہ ہونے والے کابینہ کے اجلاس کے بعد پی ٹی آئی قیادت کے نام ایگزٹ کنٹرول لسٹ میں ڈالے جائیں گے۔
سابق وزیراعظم ورہنما پاکستان تحریک انصاف عمران خان، عامر کیانی، پرویز خٹک ودیگر پی ٹی آئی رہنمائوں کے خلاف تحقیقات کی جائیں گی اور پتہ لگائیں گے کہ انہوں نے ممنوعہ فنڈنگ اپنے ذاتی اکائونٹس میں کیوں اور کیسے منگوائی۔
رہنما مسلم لیگ ن حنیف عباس نے کہا کہ ممنوعہ فنڈنگ کیس میں الیکشن کمیشن کے فیصلے کے بعد عمران خان بے نقاب ہو چکے ہیں، اور بہت سے اوورسیز پاکستانیوں نے پاکستان تحریک انصاف سے سوالات شروع کر دیئے ہیں۔ لیگی رہنما کا کہنا تھا کہ الیکشن کمیشن کا فیصلہ آنے کے بعد عمران خان کے خلاف کارروائی کی جائے گی، ان کا کہنا تھا کہ عمران خان بھولا بنا ہوا تھا جبکہ سب سے بڑا چور اور ڈاکو نکلا۔ عمران خان نے ذاتی مفاد کے لیے خیرات کا پیسہ استعمال کیا۔
ہم نے تو 2017 میں ہی بتا دیا تھا کہ عمران خان جھوٹا شخص اور ملکی معیشت اور خطے کیلئے سب سے بڑا خطرہ ہے۔ الیکشن کمیشن کے فیصلے کے بعد صدر مملکت ڈاکٹر عارف علوی کو مستعفی ہو جانا چاہیے۔ ن لیگی رہنما کا کہنا تھا کہ پی ٹی آئی میں صدارت کی دوڑ شروع ہوگئی ہے، اسد عمر، پرویز خٹک،شاہ محمود قریشی اور فوادچوہدری صدارت کی دوڑ میں ہیں۔
دریں اثنا پیپلز پارٹی اور مسلم لیگ ن نے پنجاب اور خیبر پختونخوا اسمبلیاں تحلیل کرنے کی شرط پر عام انتخابات کیلئے آمادگی ظاہر کردی ہے۔ وزیر داخلہ رانا ثنااللہ کا کہنا تھا کہ تحریک انصاف مخلص ہے تو صبح اسمبلیاں توڑے اور عام انتخابات کی طرف بڑھے۔ پاکستان تحریک انصاف کے پی اور پنجاب اسمبلی تحلیل کرے ہم قومی اسمبلی تحلیل کردیں گے، میں گارنٹی دیتا ہوں ۔ راناثنااللہ نے کہا کہ کے پی وپنجاب اسمبلی تحلیل کریں اور قومی اسمبلی میں دیے استعفوں کی تصدیق کرادیں، یقین دہانی کراتا ہوں ضمنی نہیں عام انتخابات ہوں گے۔
یاد رہے کہ وفاقی کابینہ نے گذشتہ روز پاکستان تحریک انصاف کے خلاف سپریم کورٹ میں ڈیکلیریشن بھجوانے کا فیصلہ کیا تھا اور جعلی اکاؤنٹس ومنی لانڈرنگ کی تحقیقات کے لیے ایف آئی اے کو بھی ہدایات جاری کی گئی تھیں۔ وزیر اطلاعات کا کہنا تھا کہ الیکشن کمیشن نے پی ٹی آئی کو غیر ملکی فنڈ لینے والی جماعت ثابت کردیا ہے، پاکستان میں یہ پہلی بار ہوا ہے کہ کسی سیاسی جماعت پر غیر ملکی فنڈنگ کا الزام ثابت ہوا۔ تحریک انصاف نے 16 اکاؤنٹس خفیہ رکھے اور عمران خان نے بیان حلفی دیا تھا کہ بیرونِ ملک سے کوئی فنڈ نہیں لیا۔