شہباز گل کی گاڑی کو ٹکر مارنے والا ملزم گرفتار
تحریک انصاف کے رہنما شہباز گل کی گاڑی کو ٹکر مارنے والے ملزم کو پولیس نے گرفتار کرلیا ہے،ملزم کو تفتیش کے لیے نامعلوم مقام پر منتقل کر دیا گیاہے،موٹر وے پر پی ٹی آئی رہنما شہباز گل کی گاڑی کو حادثہ کے واقعے کا مقدمہ تھا نہ کالیکی میں درج کر لیا گیا۔
ابتدائی تفتیش کے مطابق شہباز گل کی گاڑی کو ٹکر مارنے والے ملزم کا نام طاہر نذیر ہے جو مریدکے کا رہائشی ہے،ملزم نے انکشاف کیا کہ وہ رینٹ اے کار کا کاروبار کرتا ہے، اور اس نے اپنی گاڑی رینٹ پر وجاہت علی نامی شخص کو دی تھی۔
ملزم کا کہنا تھا کہ وجاہت علی اپنے خاندان کے ہمراہ اسلام آباد جا رہا تھا کہ اچانک اس کی گاڑی حادثے کا شکار ہو گئی۔ پولیس نے گاڑی کے مالک کی نشاندہی پر ملزم وجاہت علی کو بھی گرفتار کرلیا۔
ملزم وجاہت علی نے بتایا کہ وہ جائے حادثہ سے بھاگا نہیں تھا لیکن جیسے ہی شہباز گل گاڑی سے نکلے وہ ڈر کر چلا گیا،پولیس حکام کا کہنا ہے کہ جائے حادثہ کے شواہد اور عینی شاہدین کے بیانات کی روشنی میں یہ بات سامنے آئی ہے کہ یہ ایک عام حادثہ تھا جو ملزم وجاہت علی کی غفلت کی وجہ سے پیش آیا۔
پولیس کا کہنا ہے کہ تفتیش میں یہ بات ثابت ہو چکی ہے کہ ملزم نے شہباز گل کی گاڑی کو جان بوجھ کر ٹکر نہیں ماری،دوسری جانب شہباز گل نے واقعے کو حادثہ نہیں بلکہ خود پر قاتلانہ حملہ قرار دیا،اپنے ٹویٹ میں لکھاکہ میری گاڑی کا پیچھا کرکے جان بوجھ کر ہٹ کیا گیا یہ ایک منصوبے کے تحت ہوا۔
انہوں نے کہا کہ میں نےکہا تھا کہ خان کے ساتھ کھڑا ہوں،زیادہ سے زیادہ مجھے قتل کروادیں گے، کروادیں،قوم کو بتانا چاہتا ہوں یہ خان پر بھی حملہ آور ہوں گے،شہبازگل کے الزامات پر وزیراعظم حادثے کی تحقیقات کا حکم دیا تھا۔
پی ٹی آئی کے رہنما شہباز گل گذشتہ روز موٹر وے سے لاہور سے اسلام آباد جا رہے تھے کے سکھیکی ریسٹ ایریا کے قریب پیچھے سے آنے والے کار نے انکی گاڑی کو ٹکر ماری جس سے انکی گاڑی الٹ گئی،گاڑی میں سوار شہباز گل سمیت چار افراد زخمی ہوگئے تھے۔
