صدر مملکت نے نئے آرمی چیف کی تقرری کی سمری روک لی تو غیریقینی صورتحال پیدا ہو گی لیکن آخر میں شکست عمران خان کو ہی ہو گی۔
تفصیلات کے مطابق نجی ٹی وی چینل جیو نیوز کے پروگرام ”آپس کی بات“ میں وزیر دفاع خواجہ آصف نے کہا کہ نئے آرمی چیف کی تقرری کے لیے سمری کو صدر مملکت ڈاکٹر عارف علوی کو بھیج دی جائے گی اور اگر صدر مملکت نے نئے آرمی چیف کی تقرری کی سمری روک لی تو غیریقینی صورتحال یقینا پیدا ہو گی اور حکومت کو بھی پریشانی کا سامنا کرنا پڑے گا لیکن آخر میں شکست عمران خان کو ہی ہو گی۔
انہوں نے کہا کہ نئے آرمی چیف کی تقرری کے حوالے سے سابق صدر آصف علی زرداری نے بہترین تجویز دی ہے، آرمی چیف کی تقرری کیلئے سابق صدر آصف زرداری کی رائے کو ترجیح دی جائے گی۔
وزیر دفاع کا کہنا تھا کہ نئے آرمی چیف کی تعیناتی کے لیے وزارت دفاع کی طرف سے سمری بھیجنے کا ٹائم ٹیبل اتفاق رائے سے طے ہوا تھا، طے شدہ ٹائم ٹیبل کے مطابق 1 سے 2 دن کا فرق پڑا ہے۔ میرا خیال ہے کہ صدر مملکت ڈاکٹر عارف علوی کے پاس سمری یا ایڈوائس آج پہنچ جانی چاہیے ۔
انہوں نے مزید کہا کہ سابق وزیراعظم وچیئرمین پاکستان تحریک انصاف عمران خان کے پاس سٹیبلشمنٹ سے تعلقات بہتر کرنے کا اچھا موقع ہے۔ عمران خان قائد مسلم لیگ ن وسابق وزیرعظم میاں محمد نوازشریف کو نشانہ بنانے کے تمام حربے استعمال کر چکے ہیں، جو کچھ عمران خان بولتے ہیں وہ زبان ہم نے آج تک استعمال نہیں کی۔ یہ بندہ تحائف بیچ کر کھا گیا جبکہ زکوٰة کے پیسے بھی چوری کر لیے۔