پنجاب میں صوبائی اسمبلی کی 20 نشستوں پر ضمنی انتخاب سے قبل لاہور کے حلقوں میں تعمیراتی کام زور وشور سے جاری ہے۔
مائیکروبلاگنگ ویب سائٹ ٹویٹر پر صحافی عبدالقادر نے اس معاملے کی نشاندہی کی اور باقاعدہ ویڈیو ثبوت بھی شیئر کیا جس میں دیکھا جاسکتا ہے کہ نذیر چوہان کے حلقے میں نئی سڑکوں کی تعمیر کا کام جاری ہے، سڑکوں کی تعمیر میں استعمال ہونے والی مشینری پر نذیر چوہان کے بینرز بھی واضح طور پر دیکھے جاسکتے ہیں۔
عبدالقادر نے لکھا کہ پنجاب کے ضمنی انتخاب سے قبل لاہور کے حلقوں میں راتوں رات نئی سڑکیں بننے لگیں، مشینری پہنچ گئی پیسہ بھی لگنے لگا۔
رہنما ق لیگ اور سابق وفاقی وزیر مونس الہیٰ نے اس معاملے پر ردعمل دیتے ہوئے کہا کہ نواز لیگ کی حکومت نے سپریم کورٹ کے آرڈرز کی دھجیاں اڑادی ہیں، الیکشن کمیشن کب اس معاملے پر نوٹس لے گا۔
سوشل میڈیا صارفین نے انتخابی ضابطہ اخلاق کی اس کھلی خلاف ورزی پر الیکشن کمیشن آف پاکستان سے نوٹس لینے کا مطالبہ کرتے ہوئے کہا کہ ایسے کیسے صاف و شفاف انتخابات ہوسکتے ہیں؟
محمد عمر نامی صارف نے لکھا کہ اس امیدوار نے کام کروانے کے باوجود ہار جانا ہے، اچھا ہے قوم کا کسی طرح بھلا تو ہورہا ہے۔
ایک صارف نے ضابطہ اخلاق کی اس خلاف ورزی پر تبصرہ کرتے ہوئے سوال کیا کہ یہ توہین عدالت کے زمرے میں نہیں آتا؟
ایک صارف نے لکھا کہ میرے اپنے علاقے میں بھی ایسی ہی صورتحال ہے۔
ڈاکٹر نوید احمد نے لکھا کہ اب الیکشن کمیشن کہاں ہیں؟ لوگ سڑک کیلئے اپنی دھرتی ماں کاسودا مت کریں۔
طارق محمود نے کہا کہ کیا عوام کو اس وقت سڑکوں کی ضرورت ہے یا غذا کی؟
