پاکستان تحریک انصاف کے چیئرمین عمران خان کی جانب سے پنجاب اور خیبر پختونخوا کی اسمبلیاں تحلیل کرنے سے متعلق اعلان آئندہ ہفتے میں متوقع ہے۔
خبررساں ادارے کی رپورٹ کے مطابق پی ٹی آئی ذرائع کا کہنا ہے کہ آئندہ ہفتے سابق وزیراعظم عمران خان ویڈیو لنک کے ذریعے پی ٹی آئی کے تمام اراکین اسمبلی سے خطاب کریں گے اور اس موقع پر ہی اسمبلیاں تحلیل کرنے سے متعلق اہم اعلان کریں گے۔
اس حوالے سے مشاورت کیلئے چیئرمین پی ٹی آئی عمران خان نے صوبائی اسمبلیوں کی پارلیمانی پارٹیوں کا اجلاس بھی طلب کرلیا ہے، جمعہ کے روز خیبر پختونخوا اسمبلی پارلیمانی پارٹی کو طلب کیا گیا ہے جبکہ پنجاب کی پارلیمانی پارٹی کا اجلاس ہفتے کو ہوگا، ان اجلاسوں میں عمران خان اراکین اسمبلی کو اسمبلیاں تحلیل کرنے سے متعلق اپنے فیصلے سے آگا ہ کرتے ہوئے انہیں اعتماد میں لیں گے اور اپنی حکمت عملی کے حوالے سے اپنے ساتھیوں کو آگاہ کریں گے۔
خیال رہے کہ راولپنڈی میں لانگ مارچ کےا ختتامی جلسے سے خطاب کرتے ہوئے سابق وزیراعظم نے پنجاب اور خیبر پختونخوا کی اسمبلیاں تحلیل کرنے کا اعلان کیا تھا اور کہا تھا کہ ہم اس کرپٹ نظام کا حصہ نہیں رہیں گے۔