وفاقی وزیردفاع خواجہ آصف نے کہا ہے کہ اگر آج ادارے اپنی آئینی حدود میں رہنا چاہتے ہیں تو عمران خان دوبارہ ان کو دعوت دے رہا ہے۔
تفصیلات کے مطابق خواجہ آصف نے یہ گفتگو سیالکوٹ میں ایک تقریب سے خطاب کرتے ہوئے کی اور کہا کہ آج اگر ادارے عمران خان کی بات نہیں مانتے تو عمران ان میں تفریق کی باتیں کرتا ہے اور ان پر کیچڑ اچھالتا ہے، اب وقت آگیا ہے کہ اس ملک میں صرف اورصرف آئین کی حکمرانی ہوگی۔
وفاقی وزیر نے عمران خان اور تحریک انصاف پر تنقید کرتے ہوئے کہا کہ آج تک جن دفاعی اداروں ، عدلیہ اور الیکشن کمیشن کی جن ہستیوں یا اداروں کے ساتھ ان کی غرض تھی تو یہ ان کی تعریف کرتے نہیں تھکتے تھے،ان کی سوچ صرف یہ ہے کہ ادارے ان کی حمایت کریں اور نہ کریں غلط ہے،مگر اب ایسا ہرگز نہیں ہوگا۔
خواجہ آصف نے کہا کہ عمران خان کا بس ایک مقصد ہے کہ ایٹمی طاقت رکھنے والے ہمارے ملک کو اندر سے کمزور کیا جائے اوراس کے ادارے کمزور و منتشر ہوجائیں، ہم تمام اداروں کا احترام کرتے ہیں چاہے وہ ہمارا ادارہ پارلیمنٹ ہو، یا کوئی اور،ہم ان سب اداروں کا دفاع کریں گے۔
انہوں نے مزید کہا کہ 2023 میں آئین کے تحت صاف و شفاف انتخابات ہوں گے،تحریک انصاف کو آئین و قانون کے مطابق فیصلوں کے باوجود الیکشن کمیشن قبول نہیں ہے، چارسال اس شہر کا جو حال کیا گیا عوام اس کی گواہ ہیں، اس شہر میں چار سال کے دوران ایک اینٹ بھی نہیں لگی۔
