اداکار شان شاہد نے وفاقی وزیر احسن اقبال اور سینئر صحافی نجم سیٹھی کی جانب سے سابق وزیراعظم عمران خان کا انٹرویو کرنے پر تنقید کا کرارا جواب دے دیا، کہتے ہیں کے ماضی میں بھی بہت سی سیاسی شخصیات کے انٹرویو کئے تھے تب تو ان کو کوئی مسئلہ نہیں ہوا۔
تفصیلات کے مطابق عید کے تیسرے روز نجی نیوز چینل کے لئے سابق وزیر اعظم اور پاکستان تحریک انصاف کے چیئرمین عمران خان کا انٹرویو کرنے پر معروف اداکار شان شاہد کو شدید تنقید کا نشانہ بنایا جارہا ہے، مسلم لیگ ن کے رہنما احسن اقبال نے اپنی ٹوئٹر پوسٹ میں کہا کہ عمران خان کا انٹرویو کرنے کے لیے کسی پیشہ ور صحافی کے بجائے انٹرٹینمنٹ انڈسٹری کے کردار کا استعمال کرنے کا مطلب ہے کہ انٹرویو ہم تفریح کا حصہ تھا اور اسے سنجیدگی سے نہیں لیا جانا چاہیے۔
سینئر صحافی اور سابق چیئرمین پی سی بی نجم سیٹھی نے اپنی ٹوئٹر پوسٹ میں بلال گیلانی نامی سیاسی اور اقتصادی محقق کی پوسٹ شیئر کرتے ہوئے طنزیہ انداز میں لکھا کہ کیا بل کلنٹن اداکار ٹام کروز سے کہیں گے کہ ان کا انٹرویو لیں۔
بلال گیلانی نامی سیاسی اور اقتصادی محقق نے اپنی ٹوئٹر پوسٹ میں عمران خان کے انٹرویو سے ایک سکرین شاٹ شیئرکرتے ہوئے کہا کہ کیا سی این این ٹام کروز کو بل کلنٹن یا باراک اوباما کے انٹرویو کے لیے مقرر کرے گا؟ ہم نیوز کو شان کے ذریعے کرنا ٹھیک لگتا ہے۔
یہ وہ معیار ہے جو انڈسٹری کے سب سے نئے چینل کو بھی گہرے جیب والے ایک معزز میڈیا گروپ نے ترتیب دیا ہے۔صحافت کو پیشہ ور افراد کی طرف لوٹنے کی ضرورت ہے۔
ان ٹوئٹس کے جواب میں اداکار شان شاہد نے شدید ردعمل کا اظہار کرتے ہوئے کہا کہ اس سے قبل ماضی میں بھی سیاسی کرداروں کے بے شمار انٹرویوز کیے ہیں .پی ایم ایل این پی پی پی سے لے کر پی ٹی آئی تک .میں نے جیو شان کے لیے آپ کا انٹرویو بھی کیا تھا کہ آپ کو تب کوئی مسئلہ نہیں لگتا تھا ..اب کیا مسئلہ ہے ؟ راستہ؟ اینکر؟ یا لیڈر؟
اس ٹویٹ میں انہوں نے نجی نیوز چینل جیو کے پروگرام "جیو شان " میں خواجہ سعد رفیق کے انٹرویو کا سکرین شاٹ بھی شیئر کیا۔
واضح رہے کہ آج عید الفطر کے تیسرے روز نجی نیوز چینل "ہم نیوز" کی جانب سے اداکار شان شاہد نے سابق وزیر اعظم عمران خان کا خصوصی انٹرویو کیا جس میں انہوں نے سیاست کے علاوہ دیگر معمولات زندگی سمیت بہت سے موضوعات پر گفتگو کی۔
