سابق وزیراعظم عمران خان کو آج غدار قرار دینے والے لوگ ان کے ماضی کے بیانات سنیں ، انہیں خود ہی شرم آجائے گی۔
جی این این کے پروگرام "خبرہے" میں سینئر تجزیہ کار عارف حمید بھٹی نے کہا ہے کہ آج کی حکومت عمران خان کو غدار ثابت کرنے پر تلی ہوئی ہے، اللہ اس حکومت کو ہدایات دے، یہ عمران خان اگر فوج کے خلاف ہوتے تو سب سے پہلے میں ان کے خلاف آواز اٹھاتا۔
عارف حمید بھٹی نے کہا کہ انہیں غدار کہنے والے سنیں عمران خان ماضی میں فوج کے حوالے سے کن خیالات کا اظہار کرتے رہے ہیں۔
پروگرام میں ایک رپورٹ شامل کی گئی جو عمران خان کے ماضی کے فوج سے متعلق بیانات پر مشتمل تھی، ان میں عمران خان ایک موقع پر کہتے ہیں کہ ہر روز ہمارے فوجی ہمارے لیے ملک کیلئے اپنی جان کی قربانیاں دے رہے ہیں۔
دوسرے موقع پر عمران خان کہتے سنائی دیتے ہیں کہ آج مسلم دنیا میں پاکستان طاقتور ترین فوج رکھنے والا ملک ہے، اگر پاکستان کے پاس یہ فوج نا ہوتی تو ملک کے تین ٹکڑے ہوچکے ہوتے،اس ملک کو اللہ نے بچایا ہوا ہے،کیونکہ ہمارے پاس ایسی فوج ہے جو ملک کا دفاع کرنا جانتی ہے۔
ماضی میں قوم سے خطاب کرتے ہوئے عمران خان نے کہا تھا کہ اس ملک کو 2 قوتوں نے اکھٹا رکھا ہوا ہے، اس میں سے ایک پاک فوج ہے ، ہمیں اپنی اس مضبوط اور پروفیشنل فوج پر فخر ہے، ہمارے دشمن ہمیشہ سے یہ کوشش کرتے رہے ہیں کہ پاکستان کو تین ٹکڑوں میں تقسیم کردیا جائے اسی لیے ایک مضبوط فوج اس ملک کیلئے بہت ضروری ہے۔
ایک موقع پر عمران خان نے کہا کہ فوج کے ادارے کے خلاف کبھی بات نا کریں، ان پر تنقید نا کریں کیونکہ اگر یہ فوج نا ہوتی تواس ملک نے نہیں ہونا تھا، اس ملک کو عمران خان سے زیادہ پاک فوج کی ضرورت ہے لہذا ہمیں ہمیشہ اس ادارے کی مضبوطی کیلئے بات کرنی چاہیے۔