عوامی مسلم لیگ کے سربراہ اور سابق وفاقی وزیر شیخ رشید نے کہا ہے کہ فرانس کے صدر سے بغل گیر ہونا اور اسرائیل میں اپنا وفد بھیجنے سے پی ڈی ایم کی الٹی گنتی شروع ہو گئی ہے۔
شیخ رشید احمد نے کہا ہے کہ اسلام آباد 27 کلومیٹر کی بڑی جیل بن گیا ہے۔ یہ مصنوعی اقتدار کو بچانے کے لیے اپنے عوام پر ڈرون سے آنسو گیس کے گولے ماریں گے۔
سماجی رابطے کی ویب سائٹ ٹوئٹر پر جاری بیان میں شیخ رشید احمد نے کہا کہ 72 میں سے 22 وزرا بے محکمہ ہیں۔ اس پر ہائیکورٹ میں رِٹ دائر کر دی ہے۔ غریب کو آٹا نہیں مل رہا یہ امریکا کے 7 اسٹارہوٹلوں میں سیر سپاٹے کررہے ہیں۔
تحریک انصاف کے ممکنہ لانگ مارچ کے پیش نظر اسلام آباد میں سکیورٹی سخت کیے جانے پر تنقید کرتے ہوئے سابق وزیر داخلہ نے کہا کہ وفاقی دارالحکومت 27 کلومیٹر کی بڑی جیل بن گیا ہے۔ مصنوعی اقتدار کو بچانے کے لیے اپنے عوام پر ڈرون سے آنسو گیس کے گولے ماریں گے۔
سابق وزیر داخلہ نے مزید کہا کہ دنیا باتیں کر رہی ہے، امداد نہیں دے رہی۔ بندگلی میں جانا ہے یا الیکشن کرانا ہے،فیصلہ جلد ہوجائےگا۔
شیخ رشید نے بتایا کہ مزید 2 کروڑ لوگ خط غربت کی لکیر سے نیچے جا چکے ہیں۔ پیٹرول پر 2 ارب روزانہ غریب کی جیب سے خزانے میں جا رہا ہے۔ پہلے خزانے پر ڈاکا مارتے تھے اب غریب کی جیب پر ڈاکا مار رہے ہیں۔
