آرمی چیف اور اعلی عدلیہ سے متعلق سوشل میڈیا پر نفرت آمیز پوسٹ کرنے والے ریٹائرڈ فوجی افسر کی درخواست ضمانت مسترد کردی گئی ہے۔
خبررساں ادارے ڈان نیوز کے مطابق وفاقی تحقیقاتی ایجنسی(ایف آئی اے) نے توہین آمیز پوسٹ کرنے پرضلع کرک کے رہائشی سابق ریٹائرڈ فوجی افسر محمد رضا کو گرفتار کرکے آج پشاور کی مقامی عدالت میں پیش کیا تھا جہاں ملزم کی جانب سے ضمانت کی درخواست دائر کی گئی تھی۔
رپورٹ کے مطابق پشاور کے جوڈیشل مجسٹریٹ شیر حسن خان نے کیس کی سماعت کی اور دوران سماعت کیس کا مشاہدہ کرتے ہوئے کہا کہ محمد رضا ایک پڑھے لکھے اور پاکستان کی خدمت کرنے والے شہری ہیں، بادی النظر میں انہوں نے سوشل میڈیا پر فوج اوراعلیٰ عدلیہ کے خلاف جان بوجھ کر ریمارکس دیئے۔
عدالت نے ملزم کی جانب سے دائر ضمانت کی درخواست کو مسترد کرنے کا فیصلہ سنایاجس کے مطابق درخواست گزار بادی النظر میں جرم سے جڑا ہوا ہے لہذا عدالت اس کی ضمانت کی رعایت نہیں دے سکتی۔
واضح رہے کہ11 اپریل کو محمد رضا پر پشاور کے ایف آئی اے انسداد دہشت گردی ونگ کے تھانے میں مقدمہ درج کیا گیا تھا، عدالت نے اس معاملے پر مشاہدہ کرتے ہوئے ملزم کی جانب سے
جان بوجھ کر آرمی چیف اور اعلیٰ عدلیہ کے ججز کے خلاف بیانات اور سوشل میڈیا پوسٹس جاری کرنے کی تصدیق ہوئی تھی۔