امریکی اور عرب میڈیا کی جانب سے دعویٰ کیا جا رہا ہے کہ یوکرین پر روس کے حملے کے پیش نظر وزیراعظم عمران خان اپنا دورہ روس کا شیڈول منسوخ کر کے واپس اپنے ملک روانہ ہو رہے ہیں تاہم یہ خبریں حقائق کے منافی ہیں۔
تفصیلات کے مطابق العربیہ کی جانب سے یہ دعویٰ سامنے آیا ہے کہ یوکرین پر روس کے حملے کے پیش نظر عمران خان نے اپنا دو روزہ دورہ کچھ ہی گھنٹوں بعد ختم کر دیا اور واپسی کیلئے روانہ ہو رہے ہیں۔
وفاقی وزیر برائے اطلاعات و نشریات جو کہ وزیراعظم کے ہمراہ دورہ روس پر موجود ہیں انہوں نے بھی ان افواہوں کو مسترد کرتے ہوئے بتایا ہے کہ دورے کی منسوخی سے متعلق خبریں بے بنیاد ہیں۔
انہوں نے کہا کہ وزیراعظم کا دورہ شیڈول کے مطابق جاری ہے اور وہ طے کردہ پلان کے مطابق آج رات ہی دورہ مکمل کر کے وطن واپس پہنچیں گے۔
پاکستان کے ایک معتبر صحافی انس ملک کی جانب سے بھی ان دعوؤں کی نفی کی گئی ہے انہوں نے سماجی رابطے کی ویب سائٹ ٹوئٹر پر اپنے ایک پیغام میں کہا کہ وزیراعظم عمران خان کی روسی صدر ولادیمیر پیوٹن اور دیگر حکام کے ساتھ طے شدہ ملاقاتیں شیڈول کے مطابق جاری ہیں۔
انس ملک نے یہ بھی کہا کہ امریکی خبررساں ایجنسی ایسوسی ایٹڈ پریس کی رپورٹ غلط ہے کیونکہ ذرائع کے مطابق ملاقات جاری ہے۔
واضح رہے کہ وزیراعظم دو روزہ دورے پر روس میں موجود ہیں۔ ماسکو ایئرپورٹ پہنچنے پر عمران خان کا روس کے ڈپٹی وزیر خارجہ نے استقبال کیا جب کہ وزیراعظم کو ائیر پورٹ پر گارڈ آف آنر بھی پیش کیا گیا۔ دو روزہ دورے کے دوران دونوں ملکوں میں وفود کی سطح پراہم ملاقاتیں اورمعاہدے ہوں گے۔
وزیراعظم عمران خان کی آج روسی صدر پیوٹن سےون آن ون ملاقات پاکستانی وقت کےمطابق دوپہر 3 بجے شروع ہونےکا امکان ہے اور وزیر اعظم پاکستانی وقت کے مطابق آج شام 6 بجے روس کےڈپٹی وزیراعظم سے بھی ملاقات کریں گے۔
عمران خان آج دوسری جنگ عظیم میں جان دینے والے فوجیوں کی یادگار پر پھول چڑھائیں گے اور تاجربرادری سے بھی ملاقاتیں کریں گے۔ اس کے علاوہ وہ اسلامک سینٹر کا دورہ کریں گے اور پاکستانی میڈیاسے گفتگو کریں گے جب کہ آج رات ہی وطن واپس روانہ ہوں گے۔