azeezam atensari sb, aap ki ye baat drust hai keh Allah taala ne insaanu ko apna paighaam insaanu hi ke zariye pohnchaaya hai.
albatta Allah taala ne khud insaanu ko mayaar nahin banaaya hai apne kalaam ki sachayee ka, balkeh apne kalaam ko hi un ki sachayee ka saboot banaaya hai. is liye keh insaan ghalatiyan ke baghair ho hi nahin sakta agarche woh khudaa ka paighamber hi ho. lihaaza khudaa aisoon ko mayaar kyun banaaye ga jin se ghalatiyan sarzad hoti hen? paighamber bhi insaan hone ke naate insaani fitrat se waraa nahin the na ho sakte the warna woh insaan khelaa hi nahin sakte the. unhune jo bhi bulando baala kaam kiye insaan ho ker hi kiye. issi main un ki azmat thi keh woh behtareen insaan the.
rahee kisi baat ko theek tarah se samajhne ki baat to us ke liye drust mayaar ya formula laazmi hai. us ke baghair koi bhi kisi baat ko saheeh tarah se samajh hi nahin sakta. phir agar koi kisi baat ko khud drust tarah se samjhe ga nahin to us ko doosrun ko theek tarah se samjhaaye ga kaise? yahee nahin us ko kisi ke aage batore saboot kaise pesh kare ga?
is baat main kisi ko shak nahin hona chaiye keh khudaa ne paighambar chuna hi un logoon ko hai jo us ke mission ko poora kerne ke ehal the. aisa nahin hai keh khuda ne kisi naa ehal ko chuna aur phir us ko ehal ker diya. yahee wajah hai khudaa ke paighamber khudaa ki baatun ko apne dor ke sab insaanu se behtar samajhne waale the.
un main ye ehliyat bhi thi keh woh doosrun ko saheeh tareeqe se saheeh taleem de saken. yahee wajah hai logoon ne un ko support kiya un ki baaten sun ker, is liye keh un ki baaten khud logoon hi ke liye achhi thin. jin logoon ne un ko oppose kiya unhune bhi un ki baatun ko samajh ker hi oppose kiya apne apne zaati mufadaat ke khilaaf samajh ker.
khudaa ne unpadh jahil aur ganwaar logoon ko paighamber banaa ker nahin bhaija jaisa keh aksar molvi hazraat bataate hen. un ka yahee khayaal hai keh hamaari taraf bhaije ge khudaa ke aakhari paighamber unpadh the. ye baat quraan ke mizaaj ke saath mail hi nahin khaati, jo insaanu ki taleemo tarbiyat per intahee zor deta hai.
khud aqalmand aur samajhdaar insaaniyat bhi taleemo tarbiyat ko intahayee aham samajhti hai issi liye insaanu main se baaz log aqalmand bane aur un logoon ne bahot contribute kiya hai is maamle main aur ker bhi rahe hen.
is main shak nahin hai keh khudaa ke paighambrun ne khudaa ke kalaam ko hamesha aam logoon tak bahot hi achhe tareeqoon se pohnchaaya hai. magar un ki baatun ki drustagi ka mayaar bhi khud khudaa ka paighaam hi tha.
khud khudaa ke paighamberun ne bhi aqalmandi issi duniya main mojood cheezun hi se seekhi deegar logoon ki tarah. woh log bahot hi keen observer the aur learner the. issi liye duniya ko un ki zahaanat ka lohaa maanana hi pada. yaad rakhen her insaan ka ilm issi duniya ki chezun ka hi motaaj hai. yahee wajah hai jo log duniya ki cheezun se ilm haasil kerne main kamzor hun woh khudaa ke paighaam ko samajhne main bhi kamzor hi hun ge aur hote hen.
baatun ki drustagi ka wohee mayaar aaj bhi hai jo khudaa ki tarah se hamesha se tha. yani quraan ki baatun ke drust hone ka mayaar khud quraan hi hai. paighamber ki baaten nahin. aik to is liye ke paighamber insaan hote hen aur ghalatiyan ker jaate hen jaisa keh khud quraan hi main mojood hai. doosra is liye bhi keh, ye baat bhi sirf aur sirf quraan hi bataa sakta hai keh kon si baat jo logoon ne paighamber se mansoob ki hai paighmbar ki ho sakti hai aur kon si nahin.
lihaaza asal sawaal ye hai, quraan ki baatun ki drustagi ka saboot khud quraan kaise ho sakta hai?
is per bahot hi ziyaada tafseel ke saath baat ki zaroorat hai ta keh logoon ko ye haqeeqat theek traah se samajh main aa sake. albatta aasaan jawaab yahee hai keh quraan se woh usool jama ker liye jaayen jo is ko samajhne main madad dene ke liye seekhne laazmi hen. yani khud quraan hi se woh formula haasil kiye jaaye jo hamaari ye uljhan suljhaa sake.
kuchh bunyaadi baatun ki tafseel ke liye see posts 110 aur 112 ie
HERE and
HERE
For a detailed explanation of things about the quran, deen of islam and pakistan see
HERE,
HERE and
HERE
asal baat samajhne ki ye hai keh quraan aik mukammal formula hai insaanu ki guidance ke liye keh woh is duniya main kaise jiyen. is tarah jeena kyun zaroori hai insaanu ke liye jis tarah quraan bataata hai? is liye ke isse khudaa kuchh maqsad haasil kerna chahta hai insaanu ke zariye. woh maqsad kia hai jo khudaa insaanu ke zariye haasil kerna chahta hai? ye maqsad pooja paat nahin hai na hi khudaa ki taraf se insaanu ki koi aazmaaish hi hai. jab koi insaan itni baat ko ghoro fiker ker ke maloom ker leta hai to bahot kuchh us ki samajh main aa jaata hai. aur jab tak jo koi bhi itni baat ko nahin samjhe ga woh uljhanoo hi main rahe ga.
lihaaza quraan is liye diya gayaa hai taa keh log quraan se khudaa ke us maqsad ko samjhen jis ke liye us ne ye sab kuchh banaaya hai aur ye saara khail rachaaya hai. quraan woh raasta bataata hai jis ko apnaa ker log khudaa ka woh maqsad poora ker sakte hen jis ke liye un ko bahaaya gayaa hai. sirf aur sirf yahee asal deene islam hai baaqi sab logoon ki mangharat baaten hen jo unhune quraan ko samjhe baghair apni taraf se banaa leen hen.
aap itni baat per zaroor ghoro fiker karen keh agar khudaa ka is duniya ko peda kerne ka kuchh maqsad hai to woh kia ho sakta hai aur us maqsad ko poora kerne ke liye kia kia lawazmaat laazmi hen aur kia woph mojood hen? yahee baaten sab se ziyaada zaroori hen insaanu ke jaananae ke liye taa keh woh deene islam ko theek tarah se samajh saken quraan se.
ya aap yoon samjhen keh insaanu ko khudaa ne jis maqsad ke liye bhi peda kiya hai us ko poora kerne ke liye un ka zinda hona aur rehna aur khud mukhtaar hona az bas zaroori hai, to asal baat kia hui? khudaa ka maqsad ya us ko poore kerne ke lawazmaat ya dono?
yahaan se ye baat samajhna mushkil nahin honi chahiye keh khudaa ka jo bhi masqsad hai woh to sirf aik set target hai khudaa ki taraf insaanu ke haasil kerne ke liye baaqi baaten to us maqsad ke lawaazmaat ke zumre main aati hen. ab sawaal peda hota hai kia khudaa ka maqsad koi aik insaan poora ker sakta hai ya is maqsad ko sab insaanu ne mil ker poora kerna hai aik doosre ki madad se?
quraan bataata hai kuchh bunyaadi kaam insaanu ko infiraadi tor per anjaam dene hun ge jaise quraan ko khud theek tarah se samajhna ki poori poori koshish kerna. magar sab se pehle aise insaan ko jo quraan ko theek tarah se samajhna chahta hai us ke samajhne ke liye lawaazmaat haasil kerne hun ge warna quraan ko woh kabhi samajh hi nahin paaye ga theek tarah se. phir jab khud samajh jaaye to us ko usse doosrun ko samjhaane ki koshish kerni ho gi theek tarah se aur woh lawaazmaat haasil kerne hun jo aisa kerne ke liye darkaar hen. itna kaam kerne ke liye aik insaan ko kia kia kerna ho ga? kia ye kaam aise insaan ker sakte hen jo din raat un kaamun main lage rehte hen jin se kuchh bhi haasil nahin magar woh in kaamoo ko khudaa ki ibaadat samajh ker kerte hen? aise logoon ko to sirf insaani skakal main bhaid bakiyan hi kahaa jaa sakta hai.
aisi baatun se deeno mazhab ka farq saaf saaf saamne aa jaata hai. yaheen se ye baat bhi saaf saaf maloom ho jaata hai keh bahot se logoon ke khudsaakhta aqeede aur amaal bebunyaad aur ghalat hote hen aur un main logoon ke liye koi khaas bhalayee nahin hoti balkeh un se insaaniyat ko ulta shadeed nuqsanaat pohnchate hen.
kia is tanaazur main ye baat saheeh nahin hai keh jo koi bhi quraan ko theek tarah se samajhna chahta hai us ke liye sab se pehle zinda rehna aur khud mukhtar hona zaroori hai taa keh us ko is kaam se koi zabardasti roke na sake? yahee wajah hai insaanu ko sab se pehle aik aise maashre ko peda kerne ki zaroorat hai jo un ko ye mahol de sake jis main woh aisa ker saken. ye hai deene islam jis ki taraf quraan guide kerta hai. yahee wajah hai islam ki bunyaad hi jihaad hai. yani us waqt tak logoon ka aapas main aik doosre ko aqal sikhaate rehna jab tak aisa maashra wajood pazeer nahin ho jaata. ye hen deene islam ke asal pillars jin se mullah ne insaanu ko door rakha huwa hai.
mullah ne insaanu ko khudaa ke naam per aisi baatun main lagaaya huwa hai jin ka na sar hai na paer. asal bunyaadi baat to insaanu ka saheeh tarah se organise aur regulate hona hai yani aik ummat banana hai taa keh woh achhe tareeqe se is duniya main zinda reh saken taa keh phir woh khudaa ke maqsad ki taraf aasaani se badh saken.
yahee wajah hai ham ko asal deene islam ko quraan se theek tarah se samajhne ki poori poori koshish kerni chahiye aur mullah ki ghulaami se nikalna chahiye. links main main ne bataa diya hai quraan ko theek tarah se samajhne ke liye insaanu ko kia kia kerna ho ga. apna sar zameen per patakhna aur apna pichhla hissa hawa main lehraana deene islam nahin hai na hi khudaa ki ibaadat hai is liye keh aise kaamoon se khudaa ka diya huwa maqsad na maloom kiya jaa sakta hai na hi poora kiya jaa sakta hai. jin logoon ne ye baaten ijaad ki hen un ka maqsad logoon ko aise kaamun main lagaana tha jin se log bewaqoof bane rahen taa keh un ka kaam chalta rahe aur yun un ka maqsad poora hota rahe. in kaamun ka parchaar kerne waale issi liye insaaniyat ke dost nahin dushman hen.
insaanu ne is duniya main sirf aik baar hi aana hota hai agar woh apna apna waqt yun zaaya ker ke chale jaayen ge to un ko kia haasil ho ga? un ke aise kaamun se duniya main kia behtari aaye gi insaaniyat ke liye?
regards and all the best.