پی ٹی آئی رکن قومی اسمبلی عالیہ حمزہ ملک نے رانا ثنااللہ کیخلاف توہین عدالت کی درخواست دائر کی۔
تفصیلات کے مطابق پی ٹی آئی نے رانا ثنااللہ کیلیے بڑی مشکل کھڑی کر دی ہے، لاہور ہائیکورٹ میں پی ٹی آئی رکن قومی اسمبلی عالیہ حمزہ ملک نے لیگی رہنما رانا ثنااللہ کےخلاف توہین عدالت کی نئی درخواست دائر کردی ہے۔
درخواست میں کہا گیا ہے کہ مسلم لیگ ن کے رہنما رانا ثنااللہ نے 30 جنوری کو عدلیہ اور ججز کیخلاف توہین آمیز الفاظ استعمال کئے۔لیگی رہنما کا بیان سوشل میڈیا پر وائرل بھی ہوچکا ہے۔
درخواست میں موقف اختیار کیا گیا ہے کہ راناثنااللہ نے اپنے بیان میں نہ صرف ججز کو دھمکیاں دیں بلکہ عدلیہ کو متنازعہ بھی بنایا ۔ سپریم کورٹ آف پاکستان اسی نوعیت کے کیسز میں نہال ہاشمی، طلال چودھری اور دیگر کیخلاف کارروائی کر چکی ہے۔لہذا رانا ثنااللہ کیخلاف عدلیہ مخالف بیان دینے پر توہین عدالت کی کارروائی کی جائے۔
