مبینہ غفلت سے مریض کے انتقال کے بعد ینگ ڈاکٹرز کی لواحقین پر تشدد کرنےکی ویڈیو منظر عام آگئی۔
تفصیلات کے مطابق لاہور کے سروسز اسپتال میں ڈاکٹروں کی مبینہ غفلت سے مریض ہلاک ہوگیا جس کے بعد لواحقین نے احتجاج کیا،ویڈیو میں دیکھا جا سکتا ہے کہ ینگ ڈاکٹرز لواحقین پر تشدد کر رہے ہیں۔ ینگ ڈاکٹرز نے اسپتال کے عملےکو ایمرجنسی دروازے بند کرنےکو کہا اور باہر جانے والے دیگر افراد کو دھکے دیئے۔
منظر عام پر آنے والی ویڈیو میں ینگ ڈاکٹرز ایسوسی ایشن کے پیٹرن انچیف ڈاکٹر سلمان حسیب بھی دکھائی دے رہے ہیں۔ خیال رہے کہ ویڈیو منظر عام پر آنے سے قبل ینگ ڈاکٹرز ایسوسی ایشن نے مریض کے لواحقین پر تشدد کے الزام کی تردید کی تھی۔
واضح رہے کہ 5 روز پہلے بھی سروسز اسپتال کی ایمرجنسی میں ایک شخص ڈاکٹروں کی مبینہ غفلت سے جاں بحق ہو گیا تھا۔
جس کے بعد واقعے کی انکوائری کی گی اور رپورٹ میں 4 ڈاکٹروں کو قصور وار قرار دیا گیا تھا۔ جس کے خلاف ینگ ڈاکٹرز نے گزشتہ روز احتجاجاً ایم ایس آفس کا گھیراؤ کرلیا تھا۔
