سنی اتحاد کونسل کے چیئرمین صاحبزادہ حامد رضا کا کہنا ہے کہ مجھے قتل کیا گیا تو وزیر داخلہ رانا ثنا اللہ ذمہ دار ہوں گے۔ مجھے قتل کرنے کے لیے ٹیم تشکیل دے دی گئی ہے مسلسل فون کرکے مارنے کی دھمکیاں دی جارہی ہیں۔
چیئرمین سنی اتحاد کونسل نے خود کو درپیش سیکیورٹی خدشات پر ویڈیو بیان جاری کیا ہے جس میں ان کا کہنا ہے کہ ان کے قتل کی منصوبہ بندی کر لی گئی ہے تاہم ان کا کہنا ہے کہ کہ ورثا میرے قتل کا بدلہ خود لیں گے۔ چیف جسٹس مجھے ملنے والی قتل کی دھمکیوں کا نوٹس لیں، لاہور ہائیکورٹ میں اپنی سیکیورٹی بحالی کے لیے اپیل دائر کی ہے۔
انہوں نے پولیس افسران کو خبردار کرتے ہوئے کہا کہ ان لوگوں کے کہنے پر آپ مجھے مار تو لیں گے لیکن پھر بچیں گے آپ بھی نہیں۔ آپ ہمیں اسلحہ اٹھانے پر مجبور کر رہے ہیں۔ ہمیں اسلحہ اٹھانے پر مجبور نہ کریں۔ آپ کو مجھے فون کر کے دھمکیاں دینے کی بھی ضرورت نہیں ہے۔
یاد رہے کہ گزشتہ ماہ حامد رضا نے چیئرمین قرآن بورڈ پنجاب کے عہدے سے استعفیٰ دے دیا تھا۔ ان کو جولائی 2020 میں قرآن بورڈ کا چیئرمین مقرر کیا گیا تھا۔
