قومی کرکٹ ٹیم کے سابق کپتان محمد حفیظ بھی موجودہ سیاسی حالات میں وزیراعظم عمران خان کی حمایت میں بول پڑے ہیں۔
تفصیلات کے مطابق ملک میں اس وقت شدید سیاسی بحران نے ڈیرے ڈالے ہوئے ہیں،اپوزیشن جماعتیں وزیراعظم عمران خان کو گھر بھیجنے کیلئے تیار ہیں جبکہ حکومت اپنی مدت پوری کرنے کیلئے تگ ودو کررہی ہے،ایسے میں مختلف شعبہ ہائے زندگی سے تعلق رکھنے والے افراد اپنی اپنی سیاسی وابستگی کے حوالے سے اس صورتحال پر اظہار خیال کررہے ہیں۔
وزیراعظم عمران خان کی حمایت میں اب تک کھیلوں سے وابستہ افراد ،شوبز کے ستاروں سمیت تقریبا ہر شعبے سے لوگوں کی جانب سے بیانات سامنے آئے ہیں،تا زہ ترین بیان مشہور کرکٹر اور قومی ٹیم کے سابق کپتان محمد حفیظ کی جانب سے سامنے آیا ہے۔
مائیکروبلاگنگ ویب سائٹ ٹویٹر پر اپنے بیان میں پروفیسر کا کہنا تھا کہ میں بصد احترام تمام سیاسی رہنماؤں کو یہ واضح کردینا چاہتا ہوں کہ میرے وزیراعظم عمران خان سے بہت سے اختلافات ہیں، مگر ملک خودمختاری کے حوالے سے وزیراعظم کے نقطہ نظر کو دیکھتے ہوئے میں ان کے ساتھ کھڑا ہوں، میں اپنے پاکستانی ہونے پر فخر کرتا ہوں۔
انہوں نے اپوزیشن لیڈر شہباز شریف کی جانب سے "بھکاری کبھی منتخب کرنےوالے نہیں ہوسکتے" کے ٹرینڈ کو بھی اپنے بیان کا حصہ بنایا اور اس کے آگے کراس کا نشان لگاکر اس بیان کو مسترد کرنے کا اعلان کیا۔
