مزید 5 لاکھ نوکریاں اور 5 ڈالر روپے کی سرمایہ کاری۔۔ مشیر تجارت عبدالرزاق داؤد نے بڑی خوشخبری سنادی
وزیراعظم کے مشیر تجارت عبدالرزاق داؤد کا کہنا ہے کہ میڈ ان پاکستان کے تحت 100 نئے ٹیکسٹائل یونٹس کیلئے 5 ارب ڈالر کی سرمایہ کاری آئے گی اور ساتھ ہی 5 لاکھ نوکریاں بھی ملیں گی۔
عبدالرزاق داؤد نے سماجی رابطے کی ویب سائٹ ٹوئٹر پر اپنے پیغام میں کہا ہماری میڈ ان پاکستان کے مثبت نتائج سامنے آرہے ہیں، اس سے 100 نئے ٹیکسٹائل یونٹس کیلئے 5 ارب ڈالر کی خطیر سرمایہ کاری آئے گی۔
ان کا کہنا تھا کہ برآمدی استعداد میں اضافے کے ساتھ پاکستانیوں کو 5 لاکھ نوکریاں بھی ملیں گی، حکومت نے ڈی انڈسٹریلائزیشن کو الٹ دیا اب صنعت ترقی کی راہ پر گامزن ہے۔
قبل ازیں گزشتہ ستمبر میں بھی مشیر تجارت نے کہا تھا کہ موبائل فونز کی میڈ ان پاکستان پالیسی پھل پھول رہی ہے، مقامی موبائل مینو فیکچررز نے صرف 7ماہ میں 10 ہزار نوکریاں پیدا کی ہیں۔
ان کا کہنا تھا کہ 12.48ملین مقامی موبائل آلات تیارکئے گئے ہیں، جن میں 5 ملین سے زائد 4G اسمارٹ فون شامل ہیں، مشیر تجارت نے اس کامیابی پر موبائل مینوفیکچررز کو مبارکباد بھی پیش کی تھی۔
