پاک سرزمین پارٹی کے سربراہ مصطفیٰ کمال تحریک لبیک پاکستان پر پھٹ پڑے، انہوں نے کہا کہ انسان کے بچے بنو،ہم سے بڑا بھی کوئی رسول اللہﷺ کا شیدائی ہے؟
کراچی میں پریس کانفرنس سے خطاب کرتے ہوئے مصطفیٰ کمال نے کہا کہ اس شہر میں کلمہ پڑھنے والوں کے ہاتھوں سے کلمہ پڑھنے والے ذبح ہوتے تھے، 20 ،25 اور50، تمہاری ہمت نہیں تھی کہ نکل کر کوئی اس پر آواز اٹھا سکے، مصطفیٰ کمال اور اس کے ساتھیوں کی وجہ سےآج یہاں قتل و غارت نہیں ہورہی۔
سربراہ پاک سرزمین پارٹی نے کہا کہ 35 سالوں سے اس شہر میں فوجی آپریشن ہورہا ہے،قتل و غارت گری بند نہیں کرسکے، تم ہمارے منہ پرآکرنعرے لگاتے ہو ہم اسرائیل سے آئے ہوئے یہودی ہیں؟ ہم کون ہیں ہندو ہیں؟ ہمارے سامنے نعرے لگارہے ہو؟ لبیک یارسول اللہ ﷺکا نعرہ گانے سے تم زیادہ بڑے عاشق رسول ﷺ بن جاتے ہو؟
انہوں نے کہا کہ میں ایک ریلی کی قیادت کررہا ہوں تو یہ نعرے لگاتے ہوئے گزر جاتے ہیں، یہ سیاست میں حضور ﷺ کا نام استعمال کرتے ہیں، یہ ڈرامہ بازی بند ہونی چاہیے،اپنے نام پر سیاست کرو، ہمیں کافر مت سمجھو، ہماری ریلی کے راستے میں حقیقی والوں کا آفس تھا انہوں نے چار گھنٹوں کیلئے اپنا آفس بند کردیایہ ایک اچھا تاثر ہے، ان کی ریلی تھی ہم نے اپنے لڑکوں کو پیچھے ہٹالیا۔
