چند روز سے سوشل میڈیا پر افواہ پھیلی تھی کہ معروف وی لاگر حنا دانیال ملک روڈ ایکسیڈنٹ میں انتقال کر گئی ہیں تاہم اب ان کے اہل خانہ نے تصدیق کی ہے کہ حرادانیال کی موت فالج سے ہوئی ہے۔
اپنے ولاگز کے ذریعے مقامی مارکیٹس میں موجود کپڑوں اور فیشن سے جڑی دیگر اشیا پر ری ویوز دے کر شہرت حاصل کرنے والی یوٹیوبر اور وی لاگر حنا دانیال ملک کے انسٹاگرام اکاؤنٹ پر ان کی بہن اور شوہر نے وضاحتی ویڈیو جاری کرتے ہوئے ان کے انتقال کی تصدیق کی اور بتایا کہ حنا دانیال روڈ حادثے میں نہیں بلکہ "برین اٹیک" (دماغ کے فالج کے باعث انتقال کر گئی ہیں۔
حنا ملک کی بہن حرا انیس نے ویڈیو میں بتایا کہ جب ان کو بہن کی طبیعت کی اطلاع ملی تو وہ ان کے گھر پہنچیں انہیں فالج کے حملے کی حالت میں دیکھا بعد ازاں انہیں نجی ہسپتال منتقل کیا گیا، جہاں ایمرجنسی وارڈ میں ان کے بہت سارے ٹیسٹ اور سی ٹی اسکین کیا گیا۔
ان کی بہن حرا انیس نے ولاگر کے انسٹاگرام پر تقریبا 12 منٹ کی ویڈیو میں بتایا کہ حنا دانیال ملک 11 جون کو انتقال کر گئی تھیں اور وہ ان کی موت کے صدمے میں ہونے کی وجہ سے لوگوں کے جوابات نہیں دے پا رہے تھے۔
انہوں نے بتایا کہ ایمرجنسی میں کوئی ماہر اور سینیئر ڈاکٹر موجود نہیں تھا اور انہیں بتایا گیا کہ حنا دانیال ملک کے دماغ میں ممکنہ طور پر کلاٹنگ ہوئی ہے اور اس کے علاج کے لیے انہیں 11 لاکھ روپے جمع کروانے پڑیں گے۔
حرا انیس نے ہسپتال انتظامیہ کی بے حسی پر بات کرتے ہوئے کہا کہ ان کے ساتھ برا رویہ اختیار کیا گیا اور انتظامیہ کو سمجھنا چاہیے کہ کسی کے پاس بھی ہر وقت اتنی بڑی نقد رقم موجود نہیں ہوتی۔ آئی سی یو میں منتقل کیے جانے کے وقت تک ان کی بہن کا 70 فیصد دماغ ختم ہو چکا تھا اور وہ بلکل بے جان تھیں۔
انہوں نے بتایا کہ حنا دانیال ملک کا کوئی ایکسیڈنٹ نہیں ہوا اور یہ کہ ان کے شوہر سمیت ان کے سسرال والوں نے ان کی بہت دیکھ بھال کی اور اس کا حوصلہ بڑھاتے رہے۔
