شہر قائد کے علاقے میٹھا در تھانے کی حدود میں پھل فروش سے جبری طور پر سستے پھل خریدنے والے اے ایس آئی کو پولیس حکام نے معطل کردیا ہے۔
میڈیا رپورٹس کے مطابق معطل پولیس افسر کی ویڈیو سوشل میڈیا پر وائرل ہوئی تھی جس میں اس پر الزام تھا کہ پھل فروش کو خریدے گئے آم کے پیسے کم دیئے اور اسے مبینہ طور پر تشدد کا نشانہ بھی بنایا۔
ایس ایس پی کراچی سٹی شبیر احمد سیٹھار نے میٹھا در تھانے کے اے ایس آئی کے پھل فروش پر تشدد اور کم قیمت پر آم خریدنے کے واقعہ کا نوٹس لیتے ہوئے اسے معطل کر دیا۔
اے ایس آئی عمران کی ویڈیو سوشل میڈیا وائرل ہوئی تھی جس میں کچھ لوگ ایک پھل فروش لڑکے سے پوچھ رہے تھے کہ پولیس افسر نے تم سے کتنے کلو آم لیے اور اس کے کتنے پیسے دیئے۔
پھل فروش بتاتا ہے کہ وہ آم 180 روپے فی کلو میں فروخت کر رہا ہے مگر پولیس افسر نے اسے 5 کلو کے 300 روپے دیئے، ویڈیو وائرل ہونے پر ایس ایس پی سٹی نے اے ایس آئی عمران کو معطل کر کے اے ایس پی بغدادی کو انکوائری افسر مقرر کر دیا۔