وفاقی وزیر خزانہ مفتاح اسماعیل نے اعلان کیا ہے کہ حکومت نے لگژری اشیاء کی درآمد پر عائد پابندی ختم کرنے اور فکس سیلز ٹیکس عائد کرنے کا فیصلہ کرلیا ہے۔
وفاقی وزیر خزانہ مفتاح اسماعیل نے یہ اعلان اسلام آباد میں ایک پریس کانفرنس سے خطاب کرتے ہوئے کیا اور کہا آئی ایم بھی چاہتا تھا کہ ہم درآمد پر عائد پابندی ہٹالیں، بین الاقوامی تقاضے پورے کرنے کیلئے بھی درآمد کی اجازت دینا ضروری تھا،ہم نے روپے کی قدر کو مستحکم کرنے اورامپورٹ بل کو کم کرنے کیلئے درآمد پر پابندی عائد کی تھی اب امپورٹ ہمارے کنٹرول میں ہے اس لیے ہم یہ پابندی ختم کررہے ہیں۔
انہوں نے مزید کہا کہ لگژری آئٹمز کی امپورٹ پر عائد پابندی ختم کررہےہیں تاہم لگژری امپورٹڈ اشیاء پر عائد ڈیوٹیز پر تین گنا آرڈیز لگائیں گے، مہنگی گاڑیوں کی درآمد پر بھاری ڈیوٹی لیں گے، بڑی گاڑیوں پرزائد ڈیوٹیز لگائیں گے، اس وقت آٹے ،دال اورچینی ہماری ترجیح ہے،حکومت نے بہت سے اشیاء پر عائد ٹیکس موخر کردیا ہے۔
وفاقی وزیر خزانہ مفتاح اسماعیل نے کہا کہ آئی ایم ایف کی جتنی شرائط تھی ہم نے پوری کی ہیں ، چین اور دیگر دوست ممالک نے بہت تعاون کیا ہے۔
فکس سیلز ٹیکس کے حوالے سے بات کرتے ہوئے وزیر خزانہ نے کہا کہ ریٹیل ٹیکس کلیکشن48 ارب سے کم کرکے27 ارب کردیا ہے، امید ہے ریٹیل ٹیکس سے یہ ہدف حاصل کرلیں گے، یکم اکتوبر سےیونٹس بڑھنے پر سیلز اور انکم ٹیکس بھی بڑھتا رہے گا۔
